रेशम चौधरीके रिहाइ नैहुइटसम सरकारमे नैजैना
काठमाडौं, ११ पुस । संरक्षक रेशम चौधरीके रिहाइ नैहुइटसम नागरिक उन्मुक्ति पार्टी सरकारमे सहभागी नैहुइना हुइल हो । पार्टीके सोमबार डिल्लीबजार कारागारमे बैठल बैठकसे चौधरीके रिहाइ नैहुइटसम सरकारमे सहभागी नैहुइना निर्णय करल हो । मने, उक्त पार्टी प्रचण्ड नेतृत्वके सरकारहे भर समर्थन कैना जनैले बा । राप्रपा फेन सरकारमे नैजाके सरकारहे समर्थन किल कैना बा ।
प्रधानमन्त्री पुष्पकमल दाहाल प्रचण्ड आज सोम्मारके दिनके ४ बजे शपथ लेटी बाटै । उहे क्रममे कुछ मन्त्री फेन शपथ लेटी रहल बाटै ।
माओवादीसे नारायणकाजी श्रेष्ठहे उपप्रधानमन्त्री बनैना ओ राष्ट्रिय स्वतन्त्र पार्टीसे सभापति रवि लामिछानेके नेतृत्वमे सरकारमे सहभागी हुइना निर्णय करसेकल बा । ओस्टके, उपाध्यक्ष विष्णु पौडेलके नेतृत्वमे नेकपा एमाले सरकारमे जैना हुइल बा ।
नागरिक उन्मुक्तिसे रेशम चौधरीलगायतके बन्दीके रिहाइ, झुठा मुद्दा खारेज तथा टीकापुर घटनापाछे गिरिशचन्द्रलाल नेतृत्वके आयोगसे तयार पारल प्रतिवेदन सार्वजनिक करे पर्र्ना माग रख्टी आइल बा ।
यहोर नागरिक उन्मुक्तिसे सुदूरपश्चिम ओ लुम्बिनी प्रदेशमे सरकारके नेतृत्वके लाग फेन दाबी करटी रहल बा । उक्त पार्टी प्रतिनिधि सभामे ३ सिट जित्ले बा । बर्दिया २ से स्वतन्त्र जिटल रेशम चौधरीके बाबा लालवीर चौधरी फेन नागरिक उन्मुक्ति रोजसेकल बाटै । यहोर प्रदेश ओर सुदूरपश्चिममे ७, लुम्बिनीमे चार ओ मधेस प्रदेशमे एक जाने सांसद रहल बाटै ।
