भविष्य निर्माणके लाग गुणस्तरीय शिक्षा आवश्यकः मुख्यमन्त्री भट्ट
पहुरा समाचारदाता
धनगढी, १५ पुस । सुदूरपश्चिम प्रदेशके मुख्यमन्त्री त्रिलोचन भट्ट गुणस्तरीय शिक्षाके विकास कैना नीजि विद्यालयके महत्वपूर्ण योगदान रहल बटैले बटै । धनगढीस्थित बालमिकी इन्टरनेशनल स्कूलके वार्षिक खेलकुद समापन कार्यक्रममे बोल्टी मुख्यमन्त्री भट्ट सुन्दर भविष्य निर्माणके लाग अनुशासनसहितके गुणस्तरीय शिक्षाके आवश्यकता रहल बटैलै ।
उहाँ कहलै, ‘बालमिकीसे डेटी आइल गुणस्तरीय शिक्षा सक्कुहुनके लाग प्रेरणादायी बा । यकर निरन्तरता होए ।’ स्कूलके प्रिन्सिपल मनोज विश्वकर्मा मोफसलममेफे अन्तर्राष्ट्रियस्तरके शिक्षा प्रदान कैना प्रयास स्वरूप स्कूल सञ्चालन करल बटैलै । उहाँ कहलै, ‘स्कूलमे अन्तर्राष्ट्रियस्तरके शिक्षण विधिके साथे भौतिक संरचना, अतिरिक्त क्रियाकलाप, प्रगतिशील विधिसे सिकाइ प्रक्रिया अवलम्बन करटी आइल बटी ।’
चार दिनसम सञ्चालन हुइल खेलकुद प्रतियोगितामे फुटबल, बास्केटबल, रिले रेश, एक सय मिटर, दुई सय मिटर ओ चार सय मिटर दौडलगायतके खेल हुइल रहे । कार्यक्रम स्कूलके अध्यक्ष दिनेश भण्डारीके अध्यक्षतामे हुइल रहे ।