रामपुरमे थारु डिउता स्थापना
धर्म संस्कृति संरक्षण कैना आवश्यकः अध्यक्ष बम
पहुरा समाचारदाता
हसुलिया, १८ चैत । कैलालीके कैलारी गाउँपालिका वडा नम्बर ७ रामपुर गाउँमे डिउता स्थापना करगैल बा ।
कैलाली जिल्ला थारु गुरुवा बैदवा समाज सेवा समितिसे डिउता स्थापना करगैल हो । कार्यक्रमके बर्का पहुना कैलारी गाउँपालिका वडा नम्बर ७ के वडाध्यक्ष तथा प्रवक्ता दिपेन्द्रबहादुर बम रहल रहिट । कार्यक्रममहे सम्बोधन कैटी अध्यक्ष बम सामाजमे रहल धार्मिक, सांस्कृतिक विकाससंगे गाउँघरके आर्थिक, सामाजिक विकास कैना फेन आवश्यक रहल बटाइल रहिट ।
‘धर्म संस्कृति समुदायके पहिचान हो, इहीहे संरक्षण सम्बद्र्धन कैना आवश्यक रहल बा’, अध्यक्ष बम कहलै– ‘व्यक्ति समुदायसे मानजैना धर्म संस्कृतिके विकाससंगे गाउँघरके आर्थिक, सामाजिक विकास फेन कैना हमार दायित्व हो ।’
अध्यक्ष बम गाउँघरके विकासके लाग यहाँके शिक्षा, स्वास्थ्य ओर फेन विशेष ध्यान डेहे पर्ना फेन बटाइल रहिट । ‘यहाँके शिक्षा, स्वास्थ्य, भौतिक संरचना, डगरघाट लगायतके समग्र विकासके लाग हमार विशेष ध्यान रही, ओकर लाग गाउँपालिकासे सहयोग कैना फेन मोर पहल रही’, अध्यक्ष बम कहलै ।
कार्यक्रमके घरगोसिया तथा कैलाली जिल्ला थारु गुरुवा बैदवा समाज सेवा समितिके अध्यक्ष रामप्रसाद चौधरी थारु समुदायमे रहल गुरुवा बैदवाहुक्रनके संख्या घट्टी गैलमे चिन्ता व्यक्त करल रहिट । उहाँ थारु समुदायके भोज भटेरसे लेके मर्नीकर्नी अथवा कौनो फेन शुभकार्यके लाग गुरुवा बैदवा आश्यक पर्ना हुइना ओरसे समाजमे रहल गुरुवा बैदवा घट्टी गैल प्रति चिन्ता व्यक्त करल रहिट ।
उहाँ कहलै– ‘हमार समुदायमे भोज भटेरसे लेके मर्नीकर्नी अथवा कौनो फेन शुभकार्यके लाग गुरुवा बैदवा आवश्यक परठै, मने दिनप्रति दिन गुरुवा बैदवाहुक्रनके संख्या घट्टी गैल बा । यम्ने सक्कुजाने विशेष ध्यान डेना जरुरी रहल बा ।’
देउथानमे २३ मेरके टमान देवी देउटाहे ढारगैल बा । थारु समुदायके सबसे बर्का देउता जगननथियासे लेके भेँरुवा, बथवा, सपलेहरी, पाँचो पंदो लगायतके देउता रहल अध्यक्ष तथा बर्का गुरुवा चौधरी बटैलै । उहाँ हरेक साल देउथानमे पूजा फेन हुइना जनैलै ।
२०७३ साल स्थापना हुइल कैलाली जिल्ला थारु गुरुवा बैदवा समाज सेवा समितिमे कैलाली जिल्ला भरके पाँचसयसे ढेर गुरुवा बैदवा आवद्ध रहल जनाइल बा ।
कार्यक्रम कैलाली जिल्ला थारु गुरुवा बैदवा समाज सेवा समिति रामपुरके आयोजनामे हुइल रहे । कार्यक्रममे थाकस क्षेत्रीय सभापति कृष्ण प्रसाद चौधरी, सामुदायिक वन समन्वय समितिके अध्यक्ष रमेश चौधरी, मनिराम बखरिया, वडा नम्बर ४ के वडा अध्यक्ष ठागुराम चौधरी, वडा नम्बर ६ के वडाध्यक्ष प्रेम चौधरी, वडा नम्बर ७ के वडा सदस्य तुनीराम चौधरी, सुन्दरी चौधरी, आरती विक लगायतके उपस्थिति रहल रहे ।
कार्यक्रममे थारु महालोक गायक मनिराम चौधरी आपन सांस्कृतिक प्रस्तुति राखल रहिट । ओस्टके टमान गाउँसे आइल सांस्कृतिक टोलीसे फेन सांस्कृतिक कार्यक्रम प्रस्तुत करगिल रहे । कार्यक्रम मञ्जु पलपरिया सञ्चालन करल रही ।
फोटुः पहुरा थारु दैनिक
