गलत इतिहास सच्याइना मागसहित ज्ञापनपत्र

पहुरा समाचारदाता
धनगढी, १५ फागुन । नेपाल पत्रकार महासंघके संस्थागत गलत इतिहास सच्याइना माग सहित नेपाल आदिवासी जनजाति पत्रकार महासंघ (फोनिज) कैलालीसे सात दिने अल्टिमेटम सहित ज्ञापनपत्र बुझैले बा ।

मंगरकेफोनिज कैलालीसे नेपाल पत्रकार महासंघ कैलाली अध्यक्ष हिमाल जोशीहे ज्ञापन पत्र बुझाइल हो । फोनिज केन्द्रिय समितिके सर्कुलर अनुसार नेपाल पत्रकार महासंघ जिल्ला शाखामार्फत् महासंघ केन्द्रहे पुनःस्मरणके लाग सात दिने अल्टिमेटम सहित उ ज्ञापनपत्र बुझाइल हो ।

ज्ञापनपत्रमे कहल बा“नेपाल आदिवासी जनजाति पत्रकार महासंघ (फोनिज) नेपाल पत्रकार महासंघके गलत इतिहास सच्याउन लम्मा समयसे संघर्षरत रहल सर्वविदिते रहल बा । तथ्य ओ प्रमाणके आधारमे नेपाल पत्रकार महासंघ (तत्कालीन नेपाल पत्रकार संघ) के संस्थापक अध्यक्ष सत्यनारायण बहादुर श्रेष्ठ हुइट । श्रेष्ठहे महासंघकेसंस्थापक अध्यक्ष कायम कैना २०७९ सालमे नेपाल पत्रकार महासंघके सक्कु समिति मार्फत माग करल रहे । मने, गलत इतिहास सच्याके अग्रजके योगदानहे सम्मान कैना महासंघ तयार नैहुइल ।

सर्वमान्य इतिहास स्वीकार्न नेपाल पत्रकार महासंघ तयार नैरहल कारण गलत इतिहासहे प्रश्रय डेना महासंघके नियत विरुद्ध फोनिज निर्णायक आन्दोलनके चरणमे पुगल बा । तसर्थ, ७ दिनभित्रे सत्यनारायण बहादुर श्रेष्ठहे नेपाल पत्रकार महासंघके संस्थापक अध्यक्ष कायम कैना माग करटी । हमार माग पूरा नैहुइलेसे नेपाल पत्रकार महासंघका केन्द्रसहित देशभरके कार्यालयमे अनिश्चितकालीन तालाबन्दी कैना जानकारी कराइटी ।”

परिपत्रअनुसार इहे फागुन २१ गते नेपाल पत्रकार महासंघके केन्द्र, प्रदेश ओ सक्कु जिल्लामे अनिश्चितकालीन तालाबन्दी समेत कैना कार्यक्रम रहल बा । ज्ञापनपत्र बुझाइ फोनिज सुदूरपश्चिम प्रदेश इन्चार्ज भीम चौधरी, प्रदेश अध्यक्ष लखन चौधरी, थारु पत्रकार संघका केन्द्रिय उपाध्यक्ष प्रेम चौधरी, फोनिज कैलाली अध्यक्ष राम दहित, पूर्व अध्यक्ष अविनाश चौधरी, सचिव सागर कुश्मी, प्रेमलाल चौधरी, दुर्जन चौधरी लगायतके उपस्थिति रहल रहे ।