वनदेवी कृषि सहकारीसे स्वरोजगार कर्जा प्रवाह
पहुरा समाचारदाता
हसुलिया, १६ फागुन । कैलारी गाउँपालिका–१ हसुलियामे रहल वनदेवी कृषि सहकारी संस्था लिमिटेडसे स्वरोजगार जन्य व्यवसाय कार्यमे कर्जा प्रवाह कार्यक्रम अन्तर्गत कर्जा माग करल शेयर सदस्यहुकनहे कर्जा प्रवाह करल चेक हस्तान्तरण करले बा ।
सुदूरपश्चिम प्रदेश स्वरोजगार विकास कोष धनगढीके आर्थिक सहयोगमे ३४ जनहनहे स्वरोजगार जन्य व्यवसाय कार्यके लाग एकदम सहुलिय एक प्रतिशत व्याजदरमे कर्जा प्रवाह करटी रहल बा ।
कैलारी गाउँपालिकाके उपाध्यक्ष भगवतीकुमारी चौधरीके बरका पहुनामे हुइल एक कार्यक्रमके विच उहाँ चेक हस्तान्तरण करल रहिट । पहिल चरणमे बुधके रोज १३ जनहनहे चेक हस्तान्तरण कैगिल बा । कार्यक्रममे सम्बोधन करटी गाउँपालिका उपाध्यक्ष जौन उद्देश्यसे ऋण लेहल बा, ओम्नेहे लगानी कैना आग्रह करली ।
यहाँके यूवा विदेश पलायन हुइना क्रम बह्रल बा,’ उहाँ कहली–‘ सुदूरपश्चिम प्रदेश स्वरोजगार विकास कोष धनगढीके आर्थिक सहयोगमे वनदेवी कृषि सहकारी संस्था लिमिटेडसे मजा कार्यक्रम सुरुवाट करले बा । उद्देश्य अनुसार लगानी ओ मेहनत करलेसे साँवा व्याजफे मजासे तिरे सेक्ना ओरसे आम्दानीके स्रोतफे बह्राई सेक्जाई ।’
यी सहकारीसे स्वरोजगार जन्य व्यवसाय कार्यमे कर्जा प्रवाह कार्यक्रम अन्तर्गत कर्जा माग करल शेयर सदस्यहुकनहे कर्जा प्रवाह करटी रहल बा, यिहीहे अपन पैसा सम्झके उत्पादन ओ फाइदा हुइना क्षेत्रमे लगानी कैना आग्रह करली । सहकारीसे लगानी करके केल नइहुइना समय समय अनुगमन कैना जरुरी रहलफे उहाँ बटैली ।
कार्यक्रममे सहकारीके ऋण उपसमिति संयोजक रामकृष्णी चौधरी समयमे किस्ता ओ व्याज तिरटी गैलेसे सहकारीहेफे काम कैना सहजुल हुइना बटैली । लेखा समिति संयोजक टीकाराम चौधरी ऋण लेहेबेर कम लग्ना मने तिरेबेर ढेर लग्ना बटैलै । उद्देश्य अनुसारके लगानी करलेसे लेहल कर्जा तिर्नामे कौनो समस्या नइहुइना बटैलै । सहकारीके उपाध्यक्ष तिर्थ प्रसाद नेपाल कर्जा लेहल जस्टे बुझैलेसे गाह्रो नइहुइना बटैटी छनौटमे परुइयामे उत्पादनमुलक क्षेत्रमे लगानी कैना बटैलै ।
पहिल चरणमे स्वरोजगार जन्य व्यवसाय कार्यमे कर्जा प्रवाह कार्यक्रम अन्तर्गत कर्जा पउइयामे अर्जुन बहादुर चौधरीहे सेटरिङ सेवाके लाग एक लाख पचास हजार, रविना कुमारी चौधरीहे फर्निचर उद्योगके लाग एक लाख, लहियादेवी चौधरी तरकारी खेतीके लाग एक लाख, कृष्णामाया चौधरीहे मेडिकल संचालनके लाग ३ लाख प्रदान कैगिल बा ।
ओस्टेक करके रामेश्वर चौधरीहे तिना खेतीके लाग एक लाख पचास हजार, संगिताकुमारी गुरुङहे तिना खेतीके लाग २ लाख ५० हजार, डेनिस चौधरीहे तिना खेतीके लाग ३ लाख, महेशकुमार चौधरीहे माछापालन ओ बाख्रापालनके लाग ३ लाख, रविता गुरुङ चौधरीहे मुरगीपालनके लाग एक लाख प्रदान कैगिल बा ।
ओस्टेक करके अमृता देवी कामीहे भैसीपालनके लाग एक लाख, श्रवणकुमार चौधरीहे फर्निचर निर्माणके लाग एक लाख ५० हजार, विजयपाल चौधरीहे तिना खेतीके लाग तीन लाख, दुखीराम चौधरीहे तिना खेतीके लाग दुई लाख कर्जा प्रवाह कैगिल बा ।
वनदेवी कृषि सहकारी संस्था लिमिटेडके अध्यक्ष इच्छाकुमारी चौधरीके अध्यक्षतामे हुइल कार्यक्रममे नम्मा प्रसायफे सुदूरपश्चिम प्रदेश स्वरोजगार विकास कोषसे रकम निकास हुइल बटैली । उहाँ कहली, यी कर्जा अभिनसमके सबसे सहुलित कर्जा हो । सक्कु जाने अपन रुप्या सोचके लगानी कैबी ।’ अब्बे कर्जा लेहुइया समयमे तिरही कलेसे यिहीसे आउर ढेर कर्जाके लाग प्रक्रिया बह्रना उहाँ बटैली ।
कार्यक्रममे सहकारी प्रबन्धक सुरेशचन्द्र चौधरी स्वरोजगार जन्य व्यवसाय कार्यमे कर्जा प्रवाह ओ यकर उद्देश्यबारे जानकारी डेहल रहिट । उहाँ यी कार्यक्रम २०८५ फागुनसमके लाग रहल बटैले । कार्यक्रमके संचालन सहकारीके सचिव विन्तीराम चौधरी करल रहिट ।
