जवलपुरमे चिरैं भजहर मनागिल

पहुरा समाचारदाता
पहलमानपुर, २० चैत । कैलालीके घोडाघोडी नगरपालिका–११ जवलपुरमे सोम्मारके रोज चिरैं भजहर मनागिल बा ।

उ गाउँक बरका गुरुवा ज्वाला प्रसाद कठरिया, भल्मन्सा मंगल चौधरीके नेतृत्वमे विधि, संस्कृति ओ परम्परा अनुसार चिरैं भजहर मनागिल हो । जवलपुर गाउँक १३५ घरधुरीके एक÷एक जाने दिदीबहिनीयाहुकनके चिरैं भजहरमे सहभागी हुके परम्परा अनुसार पुजा पाठ, संस्कृति कार्यक्रम ओ टमान मेरिक खेल कार्यक्रम कैगिल बा ।

भजहरमे टाँरा चिरावर, कबडडी, छुरलगायतके खेल हुइल रहे । भजहरमे हुपलाल चौधरी, गाउँक सचिव गुनिलाल चौधरी, सल्लाहकार भागीराम चौधरी, अर्जुन कठरिया, मटराज कठरिया, बृद्धिजीवी लक्ष्मण चौधरी, प्रतिभा चौधरी, सुनिल चौधरी, विरबहादुर चौधरीलगायतकेफे सहभागिता रहे ।