मानवअधिकारके अनुभूति नैहुइल
पहुरा समाचारदाता
धनगढी, २९ चैत । आर्थिक, सामाजिक, सांस्कृतिकलगायतके अधिकार उठान हुइ नैसेकल ओरसे नागरिकहुक्रे मानवअधिकारके अनुभूति करे नैसेकल एक कार्यक्रमके सहभागीहुक्रे बटैले बटैं ।
इन्सेकके आयोजनामे बिफेक रोज धनगढीमे हुइल मावनअधिकार अनुगमनसम्बन्धी क्षमता अभिबृद्धि कार्यक्रममे सहभागीहुक्रे नागरिकके अपेक्षानुसार मानवअधिकारके अभियान चलाइ परनामे जोड डेले रहैं ।
कार्यक्रममे राष्ट्रिय मानव अधिकार आयोगके सुदूरपश्चिम प्रदेश प्रमुख हरि ज्ञवाली मानव अधिकार अनुगमन, तथ्य संकलन एवं अनुसन्धानबारे कार्यपत्र प्रस्तुत करैटि मानव अधिकारके विषय वस्तुमे केन्द्रित होके व्यवस्थित रुपमे सूचनाके संकलन ओ व्यवस्थापन करलेसे मानव अधिकारसँग सम्बन्धित घटना वा सवाल उठान करे परना बटैलैं । उहाँ कलैं, मानव अधिकार उल्लंघन वा ज्यादतिके घटनाके सम्बन्धमे कानून बमोजिम छानबिन कैके निष्कर्ष निकाली आवश्यक कारवाही आगे बह्राइ पह्रठ ।
कार्यक्रममे फेडोके सबिना घिमिरे महिला, बालबालिका, अल्पसंख्यक ओ सीमान्तकृतहुक्रे ढेर मानवअधिकारके घटना भोगे परल बटैलैं । उहाँ घटनामे पीडितहुक्रे सुरक्षाके प्रत्याभूति, अपनत्व, जवाफदेहिता नैरहल ओरसे फेन नागरिकहुक्रे मानवअधिकारमे प्रत्याभूति करे नैसेकल बटैलैं ।
अस्टेक, सहभागीहुक्रे विद्यार्थीहुक्रे गुणस्तरीय शिक्षा नैपाके कुलतमे लग्ना, विसंगति ओर जैनालगायतके अवस्था सिर्जना हुइना ओरसे यहोर फेन सरोकारवाला ध्यान डेहेपरना बटैले रहैं । कार्यक्रममे पत्रकार रमेश ऐरी, अम्बिका भण्डारीलागयत मन्तव्य व्यक्त करले रहैं ।
कार्यक्रममे इन्सेकके सुदूरपश्चिम प्रदेश संयोजक खड्कराज जोशी सहजीकरण करले रहैं ।
