बारह् प्रभावित क्षेत्रमे पूर्वसूचना

पहुरा समाचारदाता
टीकापुर, ६ कुँवार । कर्णाली ओ मोहना लडिया आसपासके क्षेत्रमे बारह्के पूर्वसूचना डेहे लागल बा ।

स्थानीय टोल विकास संस्थासे माईकिङ कैटी बारह्के पूर्वसूचना बारे जानकारी डेहे लागल हुइट । राष्ट्रिय विपद जोखिम न्यूनिकरण तथा व्यवस्थापन प्राधिकरणसे एक सूचना जारी कैके इहे कुँवार ९ से ११ गतेसम भारी वर्षा हुइना हुइल ओरसे सतर्कता अपनैना अनुरोध करले बा ।

प्राधिकरणसे अनुरोध करलसँगे तटीय क्षेत्रके बस्तीमे बारह्के पूर्वसूचना डेहे लागल हो । टीकापुर क्षेत्रमे अत्याधिक वर्षा हुइना पूर्वानुमानके खबरसे तटीय क्षेत्रके बासिन्दा किल नैहोके आसपासके बस्तीमे समेत पूर्वसूचना प्रवाह करटी रहल बटै ।

टीकापुर नगरपालिका वडा नम्बर ८ के वडाध्यक्ष दीर्घ ठकुल्ला १७ टोल विकास संस्थाहे परिचालन करल जानकारी डेलै । उहाँ वर्षेनी कर्णाली लडियाके कटानसे उच्च जोखिममे रहल श्रीलंका टापुके १७ घरपरिवारहे अन्यत्र सर्र्ना तयारी हुइटी रहल बटैलै ।

उ वडाके वनगाउँ, फाँटा, अरुणा, रामडाँडा, कालिमाटी लगायतके गाउँ बारह्के जोखिममे रहल बावै । यहाँ कर्णाली लडियाके बारह्से वर्षेनी प्रभाव पर्ना करल बावै । ‘हम्रे धनजनके क्षति हुइ नैडेना ओर सचेत होके लागल बटी’ वडाध्यक्ष ठकुल्ला कहलै,‘परिस्थिति कैसिन हुइठ् उहे अनुसार परिचालन हुइना मेरके तयारीमे बटी ।’

टीकापुर नगरपालिका वडा नम्बर ७ के बारह् प्रभावित ७ टोलमे समेत पूर्वसूचना प्रवाह हुइटी रहल बा । टोल विकास संस्थाके पदाधिकारी माईकिङ कैटी बारह्के पूर्वसूचना डेटी रहल आदर्श टोल विकास संस्था बैदीके अध्यक्ष गोविन्द कोइराला जानकारी डेलै । उ वडामे दिविपुर, पर्तिपुर, माझगाउँ, हुलाकी टोल, खैरझाला, डाँडा टोल, कुन्तिपुर, सुन्दरपुर ओ ढुंगाना टोल बारह् प्रभावित क्षेत्र हो । यहाँ पथरैया ओ काँडा लडिया प्रभाव पर्ना करल बा ।

टीकापुर नगरपालिका वडा नम्बर ९ के पायल गाउँ, खक्रौला ओ रैनीबोझी समेत बारह्के उच्च जोखिम क्षेत्र हो । वहाँके बस्तीमे समेत बारह्के पूर्वसूचना हुइटी रहल बा ।

वडाध्यक्ष लौटन चौधरी उच्च जोखिमके साथे आसपासके झुँगा ओ बौनिया गाउँके बासिन्दाहे समेत सतर्कता अपनाइ लागल बटैलै । टीकापुर नगरपालिकासँगे जोरल जानकी गाउँपालिका समेत पूर्वसूचना करटी रहल विपद शाखा प्रमुख नेत्र न्यौपाने जानकारी डेलै । ओहकान अनुसार समुदाय स्तरके विपद व्यवस्थापन समिति अन्र्तगतके पूर्वसूचना कार्यदलसे बारह् प्रभावित क्षेत्रमे जानकारी करैटी रहल बा ।

जानकी गाउँपालिकाके वडा नम्बर ३, ओ ९ मे कर्णाली लडिया तथा वडा नम्बर ४ ओ ७ मे पथरैया लडिया वर्षेनी प्रभाव पर्ना करल बा । कर्णाली लडियामे आइल बारह्से मोहना लडियाहे ठुनलपाछे कैलालीके दक्षिण पूर्वी क्षेत्रके अधिकांश भूभाग डुबानमे पर्ना करल बा । यहाँके टीकापुर ओ भजनी नगरपालिकाके सयौं घरपरिवार वर्षेनी बारह् प्रभावित हुइना करल बटै ।