सुदूरपश्चिमके लडियामे बाढ सर्तकता तह पार करल
सुदूरपश्चिममे ११ सय प्रहरीहे विपद् प्रतिकार्यके लाग ‘हाइ अलर्टमे धारगिल
पहुरा समाचारदाता
धनगढी, २३ असार । सुदूरपश्चिम प्रदेश लडिया कुलुवामे सर्तकता तह पार करल कहटी सचेत रहना जल तथा मौसम विज्ञान विभाग, महाकाली बेसिन कार्यालय अत्तरिया जनैले बा ।
असार २१ गते शुकसे सुरु बर्षा २४ गते सोम्मारसम सुदुरपश्चिम प्रदेशके पहाडी तथा तराई क्षेत्रमे भारी वर्षा हुइना साथे, बैतडी, डडेलधुरा, दार्चुला, बझाङ, बाजुरा, अछाम ओ डोटी जिल्लामे आउर ढेर वर्षा हुइना पूर्वानुमान हुइल उ कार्यालय जनैले बा ।
जल तथा मौसम विज्ञान विभाग, महाकाली बेसिन कार्यालय, अत्तरियाके अनुसार महाकाली लडिया, दोदा, मोहना, खुटिया, घुरहा, कटैनी लडियामे सतर्कता तह पार करल ओरसे सचेत रना जनागिल बा ।
सदरपश्चिम प्रदेश सरकार मामिला तथा कानूनसे अँटवारके रोज सार्वजनिक प्रेस नोट जारी करटी असार २१ से निरन्रत सर्वसाधरण तथा विपद्मा खटना सक्कु मन्त्रालय, सक्कु जिल्ला विपद व्यवस्थापन समिति, स्थानीय तह तथा सक्कु सरोकारवाला ओ स्थानीयवासीसे सतर्कता अपनैना आग्रह करले बा । पहाडी भू–भागमा भू–क्षय, पहिरो तथा गेग्रान बहावके जोखिम रहना ओरसे नदीनाला ओ खहरे खोलामे पानीके सतह बह्रे सेक्ना हुइल ओरसे सतर्कता अपनैना कहल बा ।
बाढ, पहिरो, डुबान, कटानके जोखिम देखल सम्बन्धित जिल्ला ओ स्थानीय विपद् व्यवस्थापन समिति, सुरक्षा निकाय ओ नेपाल रेडक्रस सोसाटीहे तुरुन्त खबर कैना कहल बा । बस्ती लग्गे बाढ, पहिरो, डुबान जोखिम आँकलन करके सुरक्षाकर्मी एवम् स्थानीय तहसँगके समन्वयमे सुरक्षित स्थानमे सर्ना व्यवस्था मिलैना आग्रह करल बा ।
बाढके बारेमा जानकारी लेना जल तथा मौसम विज्ञान विभागके टोल फ्री नं ११५५ मे फोन कैना, तत्काल खोज, उद्धार ओ राहतके लाग जिल्ला विपद् व्यस्थापन समिति, प्रदेश आपतकालीन कार्य सञ्चालन केन्द्र पीइओसि के टोल फ्री नं १६००९१५६६८८ ओ फोन न. ०९१–५२१३२४ मे फोन कैना कहल बा ।
विपद्मा जेष्ठ नागरिक, अपाङता हुइल व्यक्ति, महिला, बालबालिकाके विशेष ध्यान रख्न, संभावित विपदहे ध्यानमे राखके खोज, उद्धार ओ राहतके लाग सम्बन्धित निकाय तयारी अवस्थामे रहना आग्रह करल बा ।
दुई दिनसे लगातार बरसल पानीसे कैलालीके दक्षिणी क्षेत्र जलमग्न हुइल बा । शुकके रातसे निरन्तर बरसल बाढसे कैलालीके कैलारी गाउँपालिकाके वडा नम्बर ७ के रतनपुर, बरका बसन्ता, छुटकी बसन्ता, मोहनपुर, भुइयाँफाटा, वडा नम्बर ५ के पवेरा, बंगलीपुर, बैसपुर, मन्कापुर, सडकपुर, वडा नम्बर १ के मनाउ, वडा नम्बर ३ के दक्षिण क्षेत्र जल मग्न हुइल कैलारी गाउँपालिका विपद व्यवस्थापन शाखाके फोकल पर्सन भुवन बखरिया बटैलै । उहाँक अनुसार निरन्तर बरसल पानी टमान क्षेत्र जलमग्न रहल मने वडा नम्बर ७ छटकपुर बसन्ताके एक दर्जनसे ढेर घरमे बाढ पेलल बा, कलेसे कटैनी लडियामे बनागिल बरका बसन्ताके पुलफे बगाइल उहाँ जनैलै ।
कैलारी गाउँपालिका वडा नम्बर ८ जलमग्न हुइल ओ भंगहा खल्ला टोलके करिब १ दर्जन घरमे पानी पेलल वडा अध्यक्ष ताराम कठरिया बटैलै ।
ओस्टेक करके कैलाली जिल्लाके भजनी नगरपालिका, जोशीपुर गाउँपालिकाके टमान क्षेत्र जलमग्न हुइल बा । कैलालीके खुटिया, मोहना, घुरहा लडियामे जल सतह बह्रल ओरसे खतरा तह पार करे सेक्ना पूर्वानुमान रहल कहटी लडिया तटिया क्षेत्रमे अँटवार रातसम उच्च सतर्कताके साथ सुरक्षित ठाउँमे रहना जल तथा मौसम विज्ञान जनैले बा ।
११ सय प्रहरीहे विपद् प्रतिकार्यके लाग ‘हाइ अलर्ट
सुदूरपश्चिममे सम्भावित विपद्के समयमे उद्धार कार्यके लाग प्रदेशके सक्कु प्रहरी युनिटहे ‘हाइ अलर्टमे धारल बा ।
जिल्ला प्रशासन कार्यालय, इलाका प्रहरी कार्यालय ओ प्रहरी चौकीमे कार्यरत प्रहरी जनशक्ति तुरुन्त परिचालित हुइना करके तैनाथ करल प्रदेश प्रहरी कार्यालय धनगढीके वरिष्ठ प्रहरी उपरीक्षक डिल्लीराज बिष्ट बटैलै । प्रदेशभर तीन दिनसे पानी परटी रहल ओरसे पहाडी जिल्ला जोरना मुख्य राजमार्ग अवरुद्ध हुइल प्रहरी जनैले बा ।
राजमार्ग परल पहिरो पन्छैना ओ सडक यातायात सुचारु कैना हिसाबसे समेत प्रभावित क्षेत्रमे प्रहरी परिचालन करल वरिष्ठ प्रहरी उपरीक्षक बिष्ट बटैलै । सुदूरपश्चिम प्रहरी कार्यालयसे डेहल जानकारी अनुसार वर्षाके कारण जयपृथ्वी राजमार्ग पहिरोके कारण बझाङ जिल्लामे यातायात सेवा अवरुद्ध हुइल बा । ओस्टे, साँफेबगर– मार्तडी सडक खण्डफे पहिरासे अवरुद्ध रहल प्रहरी जनैले बा ।
केआई सिंह राजमार्ग अन्तर्गत रडुवामे पहिरोके कारण बार–बार राजमार्ग अवरुद्ध हुइटी रहल बा । कलेसे प्रहरी खुलैना कार्य करटी रहल प्रदेश प्रहरी प्रवक्ता बिष्ट बटैलै । दार्जुला सडक खण्डके शैल्यशिखर ओ मालिकार्जुन गाउँपालिकाके सिमाना पनेबाँजमे पहिरोके कारण सडक अवरुद्ध हुइना ओ खुलैना काम हुइटी रहल बा ।
बझाङ ओ बाजुरामे भर अब्बे सडक अवरुद्ध हुके आवागमन बन्द रहल प्रहरी जनैले बा । राजमार्ग अवरुद्ध हुके प्रहरी स्थानीय तह ओ अन्य सरकारी निकायके एक्स्काभेटर लगाके सडक खुलैना काम करटी रहल बा । प्रदेशभर सक्कु प्रहरी युनिटमे उच्च सतर्कता अपनैना निर्देशन डेहल बताइल बा ।
कैलाली ओ कञ्चनपुरमे डुबान ओ बाढसे अइना खतराहे मध्यनजर करके कर्णाली, ओ महाकाली लडियाके पानीके बहाउके प्रहरीसे निगरानी करटी रहल प्रदेश प्रहरी प्रवक्ता बिष्ट बटैलै । उहाँ नेपाल प्रहरीसे सशस्त्र प्रहरी बल ओ नेपाली सेनासंग समेत विपद्मा मिलके काम कैना समन्वय करटी रहल बटैले बटै । सुदूरपश्चिममे विपद्के सामना कैना करिब ११ सय प्रहरी तैनाथ करल सुदूरपश्चिम प्रदेश प्रहरी कार्यालय धनगढी जनैले बा ।
