प्रहरी अधिकार नैहोके शान्ति सुरक्षा ओ अपराध नियन्त्रणमे कठिनाइ

पहुरा समाचारदाता
धनगढी, ३० कुँवार । सुदूरपश्चिम प्रदेशके मुख्यमन्त्री खगराज भट्ट प्रहरीसम्बन्धी अधिकार प्रदेश सरकारहे नैहोके शान्ति सुरक्षा ओ अपराध नियन्त्रणमे कठिनाइ हुइल बटैले बटै ।
सुदूरपश्चिम प्रदेश प्रहरी कार्यालय, धनगढीमे आयोजित ७१औँ प्रहरी दिवसके अवसरमे बोल्टी मुख्यमन्त्री भट्ट संविधानसे व्यवस्था करल अधिकार कार्यान्वयन कैटी प्रहरीसम्बन्धी अधिकार फेन प्रदेश तहमे हस्तान्तरण करे पर्नामे उहाँके जोड रहल बा ।
‘प्रहरीसम्बन्धी अधिकार नैरहल ओरसे प्रदेश सरकार कुछ काम करे नैसेक्ना हुइल बा । संविधानसे डेहल अधिकार कार्यान्वयन हुइ परल,’ उहाँ कहलै । प्रहरी संगठनहे राजनीतिक हस्तक्षेपसे मुक्त राखे पर्नामे जोड डेटी मुख्यमन्त्री भट्ट प्रहरीहे व्यावसायिक, दक्ष ओ प्रविधिमैत्री बनाइ पर्ना बटैलै । प्रहरी संगठनमे सुधार हुइटी गैल उल्लेख कैटी उहाँ अनुसन्धान क्षमताहे थप प्रभावकारी बनाइ पर्ना धारणा राखल रहिट ।
न्यायपूर्ण समाज निर्माण ओ नागरिकहे सुरक्षाके अनुभूति कराइक लाग नेपाल प्रहरीसे खेलल् भूमिकाके प्रशंसा कैटी उहाँ निर्मला पन्तके हत्याके दोषी आभिन पक्राउ नैपर्ना दुःखद रहल बटैलै ।
‘प्रहरी दक्ष रहलमे फेन निर्मला पन्तके घटनासे पूर्णता नैपैना दुःखद हो । उक्त घटनाके दोषी पत्ता लागे परल,’ उहाँ कहलै । अइसीन घटना दोहोरे नैडेहक लाग प्रदेश सरकार प्रहरीसँग सहकार्य कैना तयार रहल उहाँके कहाइ रहल बा ।
पाछक समय साइबर अपराध, सामाजिक सञ्जालके दुरुपयोग ओ अनलाइन ठगीके घटना बह्रटी रहल उल्लेख कैटी उहाँ लागूऔषधसे युवाके जीवन बर्बाद करटी रहल बटैलै । खुला सीमाके कारण हुइना आपराधिक गतिविधि नियन्त्रण कैना फेन प्रहरीके महत्वपूर्ण दायित्व रहल उहाँ बटैलै ।
सुदूरपश्चिम प्रदेशके आन्तरिक मामिला तथा कानुनमन्त्री खुसीराम थारू प्रहरी वीरताके प्रतीक रहल बटैलै । कानुनी राज्यके अनुभूति करैना, दण्डहीनता रोक्ना ओ सुशासन कायम कैना कार्यमे प्रहरी महत्वपूर्ण भूमिका निर्वाह करल उहाँके कहाइ रहे । प्रहरीके कारण नागरिक शान्ति ओ सुरक्षाके अनुभूति करे पाइल उल्लेख कैटी उहाँ विश्वमे नेपाल प्रहरीके छवि मजा रहल बटैलै । प्रहरी कर्मचारीहे उच्च मनोबलके साथ आपन जिम्मेवारी निर्वाह कैना उहाँ आग्रह करल रहिट ।