प्रमुख प्रशासकीय अधिकृतसहितसे घुरहा पुलके अनुगमन
पहुरा समाचारदाता
हसुलिया, २५ असार । कैलाली जिल्लाके कैलारी गाउँपालिका वडा नम्बर ४ ओ ६ जोरना घुरहा पुलके पुरुव ओर बाढके कटानीसे जोखिम बह्रलपाछे गाउँपालिकाके प्रमुख प्रशासकीय अधिकृत खगेन्द्रराज जोशीलगायतके टोलीसे अनुगमन कैगिल बा ।
शुकके रोजसे सोम्मारसम निरन्तर बरसल पानीसे घुरहा लडियामे आइल बाढसे उ पुलके पुरुव ओर कटानी करके पुल नग्ना जोखिम बह्रल हो । मंगरके रोज गाउँपालिकाके प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, योजना शाखा प्रमुख सन्तोषकुमार चौधरीलगायतसे पुलके अनुगमन करल हुइट ।
पुल निर्माण कम्पनीसे निर्माण सम्पन्न करेबेर पुरुव ओरके पंखा नइबनाके अधुरा छोरलपाछे प्रत्येक बरसके बाढसे जोखिम बह्रैटी आइल कैलारी गाउँपालिका वडा नम्बर ४ के वडा अध्यक्ष ठागुराम चौधरी बटैलै ।
उहाँ कहलै, ‘गाउँपालिकाके आर्थिक सहयोग प्रत्येक बरस बाँस, कट्टा, माटी, ग्राभेलसे मर्मत करके वारवार कैना अवस्था बनाजाइठ । बर्खा अइटीकी पुहाके लैजाईठ ।’ एक बरषमे टमान चो मर्मत कैना बाध्य बाटी, वडा अध्यक्ष कहलै, ‘ओटरासे नइपुग्ना ओरसे संघीय या प्रदेश सरकारके भारी बजेटसे तटबन्धसहिट मर्मत करे पर्ना अवस्था बा । स्थानीय सरकारके बजेट नइभियाई । उ पुलके दिर्घकालिन समस्या समाधानके लाग प्रदेश ओ संघीय सरकारसे बजेट भारी बजेट विनियोजना करे पर्ना अवस्था जरुरी बा ।’
उहाँ कहलै, ‘पुल मर्मतके लाग बजेट विनियोजना कैडेना कहटी दर्जनौ फेरा प्रदेश ओ संघीय सरकारहे ज्ञापनपत्र, ध्यानाकर्षणपत्र बुझासेकल मने बजेट विनियोजन नइकरलपाछे सालोसाल समस्या आइल हो ।’
अब्बेफे पैठल यात्रा बाहेक वारबार कैना अवस्था नइरहल वडा अध्यक्ष बटैलै ।
उ पुल संघीय सरकारके सहयोगमे २०६७ सालमे निर्माण हुइल हो ।
