पहिरो अपडेट ः दुई ठो बसमे पहिरो गिरल, ६५ यात्रु बेपत्ता

चितवन, २८ असार । नारायणगढ मुग्लिङ सडक खण्ड अन्तर्गतके सिमतालमे पहिरो गिरके २ बस पुहैले बा ।
लेदो सहितके पहिरोके कारण बसहे पुहके त्रिशूलीमे मिलाइल इलाका प्रहरी कार्यालय मुग्लिङके प्रहरी निरीक्षक निरला भण्डारी जानकारी डेली ।

नारायणगढसे १७ किलोमिटर उत्तर पश्चिममे पर्ना उ स्थानमे रातके ३ः३० बजेके समयमे सडकके उप्पर भागसे लेदोसहितके पहिरो गिरके बस पुहाइल उहाँ बटैली । दुनु बस पहिरो गिरल ठाउँ पार कैना क्रममे उप्परसे लेदो सहितके भारी पहिरो गिरल उहाँ बटैली । पहिरोके कारण सडक अवरुद्ध हुइल ओ हाल पहिरो पन्छाके सडक एकतर्फी सञ्चालनमे नानल उहाँक कहाई बा ।

घटनास्थलमे उद्धार कार्य सुरु हुई नइसेकल उहाँ बटैली । त्रिशूलीसे बसहे पुहाके घटनास्थलसे कुछ तरे पाखा लगाइल मने, वहाँसम जाई सेक्ना अवस्था नैरहल उहाँ बटैली । उहाँक अनुसार बसमे यात्रारत ६५ यात्रुहुक्रे बेपत्ता रहल ओ ओइनके अवस्था अज्ञात रहल बा ।

उद्धार कार्यके लाग नारायणगढसे गोताखोर अइटी करल बटैली । उ खण्ड अन्तर्गतके कालीखोलाके पहिरोमे गोताखोर अड्कल कारण उद्धार कार्य सुरु हुई नैसेकल प्रहरी निरीक्षक भण्डारी बटैली ।

‘अब्बे घटनास्थलमे उद्धार कार्य सुरु करे सेक्ना अवस्था नइहो । सडकके उप्परसे आइल लेदो सहितके पहिरोसे बसहे त्रिशूलीमे मिलाइल हो । लेदो सहितके पहिरो रहल ओरसे काम कैना कठिन हुइटी रहल बा ।’ उहाँ कहली, ‘बसके यात्रुहुकनके अवस्था अज्ञात बा । उद्धार कार्यके लाग गोताखोर बोलाइल बा । गोताखोरहफे पहिरोके कारण अड्कल बटै । काली खोलामे भारी पहिरो गिरल ओरसे गोतखोर घटनास्थल पुगे सेकल नइहो । गोताखोर नइहुके उद्धार कार्य सुरु करे नइसेक्गिल ।’
काठमाडौसे गौर जैना करल गणपति डिलक्स ओ वीरगन्जसे काठमाडौँ जैटी करल एन्जट बस पहिरोसहित त्रिशूलीमे गिरल हुइट ।