संरक्षणविहिन तथा अतिविपन्न बालबालिकाहे शैक्षिक सामग्री ओ विद्यालय पोशाक सहयोग

पहुरा समाचारदाता
हसुलिया, २९ असार । कैलारी गाउँपालिकामे रहल संरक्षणविहिन तथा अतिविपन्न बालबालिकाहुकनहे शैक्षिक सामग्री ओ विद्यालय पोशाक हस्तान्तरण कैगिल बा ।
सामुदायिक विकास केन्द्र डोटीके आर्थिक सहयोग ओ कैलारी गाउँपालिकाके समन्वयमे संरक्षणविहिन तथा अतिविपन्न २७ जाने बालबालिकाहुकनहे शैक्षिक सामाग्री तथा विद्यालय पोशक हस्तान्तरण कैगिल हो ।

कैलारी गाउँपालिका अध्यक्ष राजसमझ चौधरीके प्रमुख आतिथ्यमे हुइल कार्यक्रममे उहाँ संरक्षणविहिन ओ अतिविपन्न बालबालिकनहे शैक्षिक सामाग्री तथा विद्यालय पोशक सहयोगसे ओइनके पह्राईमे भारी सहयोग मिल्ना बटैलै ।
उहाँ कहलै, ‘केकरो नजरमे छोट सहयोग हुई सेकठ, मने संरक्षण विहिन ओ अतिविपन्न बालबालिकाके लाग बहुट भारी हो । आर्थिक समस्याके कारण ओइनके विचलन हुई सेकठ । पह्राई छुटे सेकठ । यी मेरिक सहयोगसे पह्राईमे निरन्तरता डेहे सेक्ही ।’
स्थानीय सरकार लग्गेक सरकार हो कहटी पाछेक दिनमे उ बालबालिकाहुकनहे कहुसे सहयोग नैपैलेसे पह्रैना जिम्मा स्थानीय सरकारके रहल गाउँपालिका अध्यक्ष बटैलै । संरक्षण विहिन, अति जोखिम ओ विपन्न कोईफे बालबालिकाके आर्थिक समस्याके कारण पह्राई नछुटे अभिनफे खोजब, कोई ओसिन हुई कलेसे ओइनफे सहयोग कैजैना उहाँ बटैलै ।

संरक्षण विहिन तथा अति विपन्न बालबालिकाहे सहयोग कैडेलकमे उहाँ सिडिसिहे धन्यबादफे ज्ञापन करलै ।
सामुदायिक विकास केन्द्र डोटीके उ कार्यक्रम अधिकृत करुणा चौधरी ‘किशोरी शसक्तिकरण परियोजना अन्र्तगत विपन्न समुदाय तथा जोखिममे रहल वा संरक्षणविहिन बालबालिका (बाल विवाह, बालश्रम, विद्यालय छोरना) क्रममे रहल बालबालिकाहुकनहे विद्यालय निरन्तरताके लाग शैक्षिक सामाग्री तथा विद्यालय पोशाक सहयोग करल बटैली ।

शैक्षिक सामाग्री तथा विद्यालय पोशाक वितरणके लाग कैलारी गाउँपालिका अन्र्तगतके वडासे विपन्न, जोखिममे रहल ओ संरक्षणविहिन बालबालिकाहुकनहे उ कार्यक्रमके लाग सिफारिस हुके आइल रहे । कार्यक्रममे वडा नम्बर ६ के वडा अध्यक्ष प्रेमबहादुर चौधरी, प्रमुख प्रशासकीय अधिकृत खगेन्द्रराज जोशी, शिक्षा शाखा प्रमुख गणेश प्रसाद मिश्र, सामाजिक विकास शाखा प्रमुख यगम कलेल, महिला तथा बालबालिका शाखा प्रमुख बालकुमारी चौधरी, इलाका प्रहरी कार्यालय हसुलियाके प्रमुख लोकेन्द्रबहादुर चन्दलगायतके सहभागिता रहे ।
