कृषि विकास बैंकसे बाल उद्यान निर्माणके लाग राष्ट्रिय माविहे चेक हस्तान्तरण

पहुरा समाचारदाता
हसुलिया, २९ असार । कृषि विकास बैंक लिमिटेड हसुलिया शाखासे कैलारी गाउँपालिका–२ उजलीशेम्रामे रहल श्री राष्ट्रिय मावि विचैपुरहे बाल उद्यान निर्माणके लाग रु. ५० हजारके चेक हस्तान्तरण करले बा ।
कैलारी गाउँपालिका वडा नम्बर २ के वडा अध्यक्ष विकास चौधरीके प्रमुख आतिथ्यमे हुइल एक कार्यक्रमके विच शनिच्चरके रोज कृषि विकास बैंक लिमिटेड हसुलिया शाखा प्रवन्धक नरेश अवस्थी ओ उ बैंकके प्रदेश कार्यालय धनगढीके प्रदेश निर्देशक अर्जुन प्रसाद ढुङगानासे विद्यालयके प्रअ जितबहादुर रावत, विद्यालय व्यवस्थापन समितिके अध्यक्ष नविनकुमार बोहरा ओ पिटिए अध्यक्ष सुनिल ओझाहे उ चेक हस्तान्तरण कैगिल बा ।

कार्यक्रममे सम्बोधन करटी प्रमुख अतिथि वडा अध्यक्ष विकास चौधरी पालिका भरके विद्यालयके तुल्नामे सबसे ढेर विद्यार्थी यिहे विद्यालयमे रहल ओ पह्राईके गुणस्तरफे सुध्रटी गैल बटैलै । उहाँ कहलै, ‘गाउँपालिकासे यी विद्यालयहे नमुना विद्यालय बनैटी रहल ओरसे बहिय निकायके सहयोग सह्रनिय हो । कैलारी गाउँपालिकाके ढेर बैंक रहल मने सामाजिक उत्तरदायित्व अन्र्तगत यी बैंक सहयोग करल । सक्कु जाने हातेमालो करके गैलेसे मजा बनाई सेक्जाइठ ।’

विद्यालयके प्रअ जित बहादुर रावत विद्यालयसे संचालन करल बाल उद्यान निर्माणके लाग सहयोग कैडेलकमे धन्यबाद ज्ञापन करलै । उहाँ कहलै, ‘कृषि विकास विकाससे कैगिल सहयोग हम्रार लाग भारी हो । अइना दिनमे सहकार्य करके आघे बह्रना सहयोग पुगी ।’
भर्खर आइल एसईई परिक्षाके रिजल्टफे मजा आइल उहाँ बटैलै । ग्रामीण क्षेत्रके विद्यालय का करे सेकी कना आममानसके सोचाई बा । मने हम्रे यी विद्यालयहे नमूना बनाके डेखैना लक्ष्यके साथ आघे बह्रल विद्यालयके प्रअ रावत बटैलै ।

कृषि विकास बैंक लिमिटेड प्रदेश कार्यालय धनगढीके प्रदेश निर्देशक अर्जुन प्रसाद ढुङगाना तराई ओ पहाड लगायत टमान ठाउँमे टमान क्षेत्रमे सहयोग करल बटैलै । उहाँ कहलै, ‘शैक्षिक कार्यक्रम प्रमुख उद्देश्य हो । यी संगे कोभिड महामारी, विपदके क्षेत्रमे, खेलकुद, धार्मिक क्षेत्रमे, साहित्य क्षेत्रमेफे सहयोग कैगिल बा । अइना दिनमे सहयोग जारी रना प्रदेश निर्देशक ढुङगाना बटैलै ।

विद्यालय व्यवस्थापन समितिके अध्यक्ष नविनकुमार बोहरा कृषि विकास बैंकसे कैगिल सहयोगसे बाल उद्यान निर्माणमे सहयोग पुगल बटैलै । उहाँ कहलै, ‘विद्यालयके शैक्षिक गुणस्तर सुधारके संगे विद्यालय प्रङगान हरियाली ओ सुन्दर बनैना उद्देश्यके साथ आघे बह्रल बटी । विद्यालयसे हजारौं रुप्या लगानी करके टमान मेरिक रुखुवा बरिख्वा ओ मेरमेराइक फुला लगैटी बाल उद्यानहे सुन्दर बनैना कार्यफे आघे बह्रले बा ।’

कार्यक्रमके संचालन कृषि विकास बैंक लिमिटेड हसुलिया शाखा प्रवन्धक नरेश अवस्थी संस्थागत सामाजिक उत्तरदायित्व कार्यक्रम अन्र्तगत श्री राष्ट्रिय माविहे बाल उद्यान निर्माणके लाग सहयोग करल बटैलै । कार्यक्रममे विद्यालयके विद्यालय व्यवस्थापन समितिके सदस्य, पिटिए सदस्यहुकनकेफे सहभागिता रहल रहे ।
