विपदमे समुदायके अगुवामे भारी भूमिकाः गापा अध्यक्ष

पहुरा समाचारदाता
हसुलिया, ३१ सावन । विपदके बेला समुदायके अगुवाहुकनके भारी भूमिका रहल कैलारी गाउँपालिका अध्यक्ष राज समझ चौधरी बटैले बटै ।

कैलारी गाउँपालिका विपद व्यवस्थापन शाखाके समन्वयमे नेपाल रेडक्रस सोसाइटी कैलालीके आयोजनामे सोम्मारके रोज हसुलियामे समुदायके अगुवाहुकनके लाग विपद अभिमुखीकरण कार्यक्रममे सम्बोधन करटी गाउँपालिका अध्यक्ष उ बाट बटवाइल रहिट । उहाँ कहलै, ‘विपद प्रकोप जबफे आई सेकठ । घटना स्थलमे समुदायके अगुवा रहठै । तत्काल उद्धार कैना ओइनके भारी जिम्मेवारी रहठ ।’

गैल हप्ता आइल बाढसे वडा नम्बर ५ ओ ७ के ९९ घर प्रभावित हुइल, ३५ जाने विस्थापित हुइना अवस्था आइल ओ एक जानेक मृत्यु हुइलफे उहाँ बटैलै । उ बेला कटैनी लडियाके पानी उपटके पुरान मन्कापुरसे रातके १२ जाने नेपाल प्रहरी, शसस्त्र प्रहरी, स्थानीय समुदायके अगुवाहुकनके सहयोगमे उद्धार करलफे अध्यक्ष बटैलै ।

कार्यक्रममे वडा नम्बर ३, ५ ओ ७ नम्बर भल्मन्सा, महिला स्वास्थ्य स्वयं सेविका, यूवा क्लव, बाल क्लवके प्रतिनिधिहुकनके सहभागिता रहल बा । अभिमुखीकरण उदघाटन कार्यक्रममे गाउँपालिकाके प्रमुख प्रशासकीय अधिकृत खगेन्द्रराज जोशीलगायतके सहभागिता रहे । अभिमुखीकरणके संचालन कैलारी गाउँपालिका विपद व्यवस्थापन शाखाके फोकल पर्सन भुवन बखरिया ओ सहजीकरण नेपाल रेडक्रस सोसाइटीके प्रकाश डांगी करल रहिट ।