बाढ पीडितके माग सुनुवाई नैहुके वनअतिक्रमण बह्रलः गाउँपालिका अध्यक्ष
पहुरा समाचारदाता
हसुलिया, १ सावन । कैलारी गाउँपालिकाके अध्यक्ष राजसमझ चौधरी बाढ पीडितके माग सुनुवाई नैहुइलपाछे बाढ पीडितहुक्रे वनजंगल अतिक्रमण करके बैठना बाध्य हुइल बटैलै ।
यूएसएआइडी बायोडायभरसिटीके सहयोगमे दाय नेपालसे संचालित ‘जल, जंगल’ कार्यक्रम अन्र्तगत मित्र समाज कठमाण्डौं ओ स्थानीय सहयोगी संस्था ‘जागृति फाउण्डेशनसे ‘जैविक विविधता ओ वातावरणीय विषयमे सरोकारवाला निकायविच गोचमेज बैठकमे उहाँ उ बाट बत्वाइल रहिट ।
कैलारी गाउँपालिका जैविक विविधता, लडिया, खोलानाला, प्राकृतिक तालतलैयासे धनीसंगै पानीजन्य प्रकोपसे पीडित बा,’ गाउँपालिका अध्यक्ष कहलै, ‘मोहना, कटैनी, घुरहा लडियाके बाढ, कटान, पटानके कारण लडिया तटिया क्षेत्रके बाढ पीडित बाध्य हुके वन जंगलमे बैठे पर्ना अवस्था आइल । केन्द्र सरकारसे स्थानीय तहके सौतेली व्यवहार बा । स्थानीय तहमे उ बस्तीहे लडियक कटान पटानसे जोगाइक लाग गुरु योजनासहितके भौतिक तटबन्ध करे सेक्ना अवस्था नइहो । जेकर कारण बाढ पीडित बसन्ता जैविक मार्गमे बैठना बाध्यता आइल बा ।
गैल बरसफे वडा नम्बर ३ स्थित शिवरत्नापुरके १६ घरके घरबास ओ खेतीयोग्य जमिन मोहना लडियासे कटान करके वेघर बनाइल उहाँ बटैलै ।
मोहना लडियासे कैलारी गाउँपालिकाके वडा नम्बर ३, ५, ओ ७ नम्बर किसानके सयौं विघा जमिन कटान करलपाछे किसानहुकनथेन हाथेम लालपुर्जा बा, मने जग्गा लडियामे परिणत हुइल गाउँपालिका अध्यक्ष बटैलै ।
कैलारी गाउँपालिका भारतके दुधुवा राष्ट्रिय निकुञ्जसे जोरल ओरसे जीवजनावर नेपाल–भारत ओहोरदोहोर कैना बेला मानव ओ जीवनजन्तु विच द्वन्द बह्रलफे उहाँ बटैलै ।
सामाजिक विकास शाखा प्रमुख यगम कलेल प्राकृतिक स्रोत सम्पदाके संरक्षण हुईबेर जीव जनावर ओ लोपोन्मुख अवस्थामे पुगल गिद्धफे हेराइल बटैलै । जलाधर क्षेत्रके संरक्षण करे नइसेकलपाछे पानीके सतह टरेजैटी रहल उहाँ बटैैलै । जलाधर क्षेत्रके संरक्षण करटी डयाम बनाके पानी सिञ्चित करेसेक्लेसे धानवाली ओ गोहुवाली सिचाई करे सेक्ना उहाँ बटैलै । इको प्रणालीहे जोगाइक लाग जैविक विविधता ओ वातावरणीय संरक्षणमे उहाँ जोर डेलै ।
वडा नम्बर ५ के वडा अध्यक्ष विष्णु प्रसाद चौधरी बसन्ता जैविक मार्ग मस्ती गैल बा कना सक्कु जानेक बुझाई रहल मने का कारणसे वनअतिक्रमण हुइल कना बाट सरोकारवाला निकायसे बुझना जरुरी रहल बटैलै । केन्द्र सरकारसे लडिया कटानके रोकथामके चासो नइडेहल कारण बसन्ता जैविक मार्ग मस्तीगैल ओरसे लडिया कटान ओ डुबानहे कम करेक लाग सरकारसे प्याकेज नानके समस्या समाधन करेपर्ना उहाँ बटैलै । हुलाकी डगरमे डयामके रुपमे विकास करल मने विकाससंगे उहीहे निम्त्याइल विनासप्रति सरकारके ध्यान नैगैल वडा अध्यक्ष बटैलै । बगरमे लगाइल बोटविरुवा मजा हुइल मने राष्ट्रिय बन सखाप हुइटी गैलफे उहाँ बटैलै ।
वडा नम्बर ६ के वडा अध्यक्ष प्रेमबहादुर चौधरी कैलारी गाउँपालिका टमान मेरके विपद प्रकोपके उच्च जोखिममे रहल बटैलै । बर्खाके बेला बाढ, कटान, पटान ओ चैत बैशाखके बेला डढेलोके उच्च जोखिममे रहल बटैलै ।
सामुदायिक वन समन्वय समितिके अध्यक्ष रमेश चौधरी चुरेके अव्यस्थित दोहनके कारण तरेक क्षेत्रमे ओकर असर परल बटैलै । उहाँ कहलै, ‘चुरे क्षेत्रसे जथाभावी ढुङगा, बालु निकारलपाछे लडियाके तरेक भाग भठटी गैल ओ पानी बस्तीमे पैठल बटैलै । २०५८ साल उहोरके वनके अवस्था हेरेबेर अतिक्रम तिव्र गतिमे हुइल बटैलै ।
कार्यक्रमके सहजीकरण मित्र समाजके कार्यक्रम संयोजक विकेकसिंह ठकुरी ओ जैविक विविधता ओ वातावरणीय विज्ञ पिताम्बर सिग्देल करल रहिट । कार्यक्रममे कैलारी गाउँपालिकाके प्रमुख प्रशासकीय अधिकृत खगेन्द्रराज जोशी, टमान वडाके अध्यक्षहुक्रे, स्थानीय सहयोगी संस्था ‘जागृति फाउण्डेशनके पुष्पराज उपाध्याय, समुदायिक वनके अध्यक्ष, सरोकारवाला निकायकेफे सहभागिता रहे ।
