२३ सय ७५ मुक्त कमैया अभिन पुनस्र्थापनाके आशमे
पहुरा समाचारदाता
धनगढी, २ सावन । मुक्त कमैया रहल जिल्लामे अभिन २ हजार ३ सय ७५ जाने अभिन पुनस्र्थापनाके आशमे रहल बटै ।
मुक्त कमैया समाजके केन्द्रीय अध्यक्ष पशुपति चौधरीसे डेलक जानकारी अनुसार कञ्चनपुरसे दाड जिल्लामे ओटरा मुक्त कमैया अभिन पुनस्र्थापनाके आश रलक जनैले बटै ।
२०५७ साल सावन ४ गते कमैया मुक्ती घोषणा करल रहे । जौन अब्बे २४ बरस विटल मने सुदूरपश्चिम प्रदेश अभिनसम अभिनसम १ हजार ८२ जाने मुक्तकमैयाहुक्रे परिचय पाके पुनस्र्थापनासे बञ्चित रहल उहाँ बटैलै ।
कैलाली जिल्लामे ९ हजार ७६२ मु्क्तकमैया रहलमे ८ हजार ९७५ जनहनहे परिचयपत्र देहलमे मने जग्गा पाइल मुक्तकमैयाभर ८ हजार २२ जाने केल रहल बटै । ओस्टेक कञ्चनपुरमे ४ हजार ५०६ जाने मुक्तकमैया रहलमे ४ हजार ४१८ जनहनहे परिचयपत्र डेहल बा, ओम्नेसे जग्गा पाइल मुक्तकमैया ४ हजार २८९ केल रहल बटै ।
चार सय मुक्तकमैयाहे आकाशे कित्ता, १७३ जनहनके मुक्तकमैयाके तथ्याङकसे हटाइल बटै । कलेसे कैलालीमे ९५३ ओ कञ्चनपुरमे १२९ जाने पुस्र्थापना बाँकी बटै ।
बर्दियामे सबसे ढेर १२ सय ४५ जाने मुक्तकमैया पुनस्र्थापनासे वञ्चित केन्द्रीय अध्यक्ष बटैलै । पुनस्र्थापनाके नाउँमे जग्गा नैरहल ठाउँक लालपुर्जा, व्यक्तिके नम्बरी जग्गाके लालपुर्जा, लडिया, खोला रहल ठाउँमे टमान मुक्तकमैयाहुकन जग्गा डेगिल बा । ओसिन समस्या सट्टा भर्ना कैना संख्या ६ सय ६१ रहल बा । परिचय बदर हुइल संख्या १७३, जग्गा नइपाइल ४६३, परिचयपत्रसे वञ्चित १ हजार ७८ जाने करके कुल २ हजार ३ सय ७५ जाने पुनस्र्थापना हुइना बाँकी बटै ।
पुनस्र्थापनाके काम आघे बह्रैना मञ्चसे आग्रह
मुक्त कमैया महिला विकास मञ्चके अध्यक्ष सीमाकुमारी चौधरी २ हजार ३ सय ७५ मुक्त कमैयाहुकनके पुनःस्थापना कार्य आघे बह्रैना माग करले बटी ।
२४ औ मुक्त कमैया दिवसके पुर्वसन्ध्यमे मुक्त कमैया महिला विकास मञ्चसे मंगरके रोज धनगढीमे पत्रकार सम्मेलनके आयोजना करके नम्मा समयके संर्घषपाछे तत्कालिन सरकारसे २०५७ साल सावन २ गते कमैया मुक्तिके घोषणा करल २४ वर्ष हुइलेसेफे अभिन पुनस्र्थापनाके काम नैटुङगल कहटी पुनस्र्थापनाके काम तत्काल आघे बह्रैना माग करले हुइट ।
पत्रकार सम्मेलनमे मुक्त कमैया ओ मुक्त कमलहरीहुकनसंग सरकारसे करल सक्कु सहमतिके पूर्ण कार्यान्वयनसहित तीनु तहके सरकारसे १० माग आघे सारगिल बा । परिचय पत्र प्राप्त करल २७ हजार ५७० मध्ये पुनःस्स्थापना हुइनसेकल २ हजार ३ सय ७५ मुक्त कमैयाके पुनःस्थापना कार्य आघे बह्राई पर्ना, १२ हजार ७६९ मुक्त कमलहरी मध्ये (परिचय पत्र प्राप्त ४,९३४, परिचय पैना वाँकी ७,८३५ ओ छुट मुक्त कमलहरी ३ हजार २९६ के पहिचान करके परिचय पत्र ओ स्वास्थ्य, शिक्षा, रोजगारके व्यवस्था करे पर्ना माग करल बा ।
भूमि, व्यवस्था, सहकारी तथा गरिबी निवारण मन्त्रालयसे मिति २०७८ सालमे श्याम श्रेष्ठके अध्यक्षतामे गठन हुइल ५ सदस्य मुक्त कमैया, हलिया, कमलरी तथा हरवा चरवा वस्तुस्थीति अध्ययन समितिसे अध्ययन करके तयार करल प्रतिवेदन कार्यान्वयन करेपर्ना माग करल बा ।
संघीय भूमि, व्यवस्था, सहकारी तथा गरिबी निवारण मन्त्रालयसे मुक्त कमैया, कमलरी, हलिया तथा हरवा चरवा पुनःस्थापनके लाग तयार पारल पुनःस्थापना कार्ययोजना तथा कार्यविधी २०७९÷८० मन्त्रीपरिषदसे पारित करके कार्यान्वयन करेपर्ना, सुदूपश्चिम प्रदेश भुमि व्यवस्था कृषि तथा सहकारी मन्त्रालयसे जारी करल मुक्त, कमैया, कम्लहरी तथा हलिया पुनस्र्थापना कार्यविधि २०८० के पूर्णरुपमे कार्यान्वयन करे पर्ना माग करल बा ।
सक्कु तहके स्थानीय सरकारसे मुक्त कमैया तथा कम्लहरीहुकनके जीविकापार्जनके कार्यकम लागु करेपर्ना, मुक्त कमैया, कमलरीहुकनके समस्या सामाधानके लाग एकिकृत ऐन जारी करके पुनःस्थापना कार्य आघे बह्राई पर्ना कहल बा ।
विविध कारणसे तथ्याक संकलनमे नाम छुट हुइल मुक्त कमैया, तथा कमलरीके पुनः तथ्याक संकलन करके परिचय पत्रके व्यवस्था करेपर्ना, मुक्त कमैया वालबालिका, ओ कमलरीहुकनहे शिक्षामे पहुँच अभिवृद्धि कैना छात्रवृत्ती शिक्षा निर्देशिका संशोधन करके लागु करे पर्ना, अभिभावक विहिन मुक्त कमलरी तथा भोज करकेफे जग्गा जमिन नइरहल मुक्त कमलरीहुकनके लाग भुमिसहितके घरबासके व्यवस्था करेपर्ना माग करल बा ।
मञ्चके कार्यक्रम संयोजक इन्द्रजित चोधरी संघीय लोकतान्त्रीक गणतन्त्र स्थापना हुइल १७ वर्ष विटसेक्सेफे सुदुरपश्चिम, ओ लुम्बीनी प्रदेशमे रहल कृषि दासतासे मुक्त घोषणा हुूइल मुक्त कमैया, बाल श्रमिकसे मुक्त हुइल मुक्त कमलहरी अभिनफे चरम गरिवी ओ अभाव जीवनयापन कैना बाध्य हुइल बटैलै ।
नेपाल सरकारसे दासताके जीवन व्यतिति करटी रहल कमैयाहुकनहे मुक्तीके घोषणा करके २४ बर्ष ओ कमलहरी मुक्ती हुइल ११ वर्ष विटसेक्लेसेफे उहाँहुकनके पूर्ण पुन स्थापना तथा जीविकोपार्जनके समस्या सम्बोधन कैना तीनु तहके सरकार उदासिन डेखल उहाँ बटैलै ।
कमैया मुक्ति दिवसके अवसरमे शुभकामना आदानप्रदान
२४औं कमैया मुक्ति दिवसके अवसरमे धनगढीमे शुभकामना आदानप्रदान कार्यक्रम हुइल बा ।
दिगो आर्थिक समृद्धिके लाग सरोकारवालाहुक्रनके भूमिकासहित मुक्तकमैया समाज सुदूरपश्चिमके आयोजनामे हुइल हो । कार्यक्रमके बर्का पहुना पूर्व भूमि व्यवस्थातथा कृषि सहकारी मन्त्री रामेश्वर चौधरी रहल रहिट । कार्यक्रममे उहाँ मुक्त कमैयाहुक्रनके गाँस, बाँस ओ कपासके ग्यारेन्टी नैहुइटसम मुक्ति दिवस मनाइलके सार्थकता नैपैना बटैलै । उहाँ मुक्त कमैयाहुक्रनके लाग बैठक लाग उचित ठाउँ, रोजगारी, शिक्षा स्वास्थ्यके ग्यारेन्टी कैना आवश्यक रहल औँल्याइल रहिट ।
ओस्टके पूर्वमन्त्री चौधरी अपने मन्त्री रहल बेला मुक्त कमैया, कमलरी, हलिया पुनस्र्थापना कार्यविधी २०८० बनाके पारित करल बटाइल रहिट । उ कार्यविधि कार्यान्वयन हुइलेसे प्रदेशमे रहल सक्कु मुक्त कमैया, कमलरी, हलियाहुक्रनके पुनस्र्थापना हुइना विश्वास फेन व्यक्त करल रहिट ।
नेकपा माओवादी केन्द्रके जगत विक मुक्त कमैया, कमलरी, दलित, महिला आदिवासी जनजातिहुक्रनके हकअधिकारके लाग सक्कु जाने एकजुट होके लागे पर्ना बटाइल रहिट ।
लालझाँडी गाउँपालिकाके कार्यपालिका सदस्य दुर्गा कामी आपन स्थानीय तहसे कमैया तथा दलित समुदायके लाग बजेट विनियोजन कैना प्रतिवद्धता जनाइल रही । मुक्त कमैया अभियन्ता बलाराम भट्टराई कमैयाहुक्रे आपन धरातल नैबिसराई पर्ना बटाइल रहिट ।
मुक्तकमैया समाजके केन्द्रीय अध्यक्ष पशुपति चौधरी मुक्तकमैयाहुक्रे आर्थिक, सामाजिक रुपमे बलगर हुइ पर्ना बटाइल रहिट ।
राष्ट्रिय हलिया महासंघके अध्यक्ष इश्वर सुनार सक्कु राजनीतिक दल मुक्तकमैया, हलिया समुदायके माग मुद्धा बिसराइल ओरसे सामूहिक रुपमे आवाज उठैना आवश्यक रहल बटाइल रहिट ।
ओस्टके मुक्तकमैया समाजके केन्द्रीय सचिव बल्लु चौधरी मुक्त कमैयाहुक्रनके तत्काल ओ दीर्घकाल रुपमे सम्बोधन हुइना सवालहे पहिचान कैके आघे बह्रलेसे कमैया पुनस्र्थापनामे सहज हुइना बटाइल रहिट ।
इन्सेक प्रतिनिधी मैनामोती चौधरी मुक्त कमैयाहुक्रनके शिक्षा, स्वास्थ्य, जिविकोपार्जनके लाग प्रदेश ओ स्थानीय सरकार नीति तथा कार्यक्रम सहित बजेट विनियोजन करे पर्ना बटाइल रही । ओकर लाग उहाँ मुक्त कमैयाहुक्रे जनदवाफ तथा चासो फेन ध्यान डेहे पर्ना औँल्याइल रही ।
ओस्टके मुक्तकमैया समाजके केन्द्रीय सदस्य सीता चौधरी देशमे स्थिर सरकार नैहोके कमैयाहुक्रनके माग मुद्धा तथा सवाल सम्बोधन हुइ नैसेकल बटाइल रही ।
कार्यक्रम मुक्तकमैया समाज सुदूरपश्चिम प्रदेश अध्यक्ष चन्द्र प्रसाद चौधरीके अध्यक्षतामे कार्यक्रमहुइल रहे कलेसे मुक्त कमैया समाज कंचनपुर जिल्ला अध्यक्ष मिना चौधरी स्वागत मन्तब्य राखल रही ।
कार्यक्रममे मुक्त कमैया अभियन्ता, सरोकारवाला निकायके प्रतिनीधी, टमान मुक्त कमैया शिविरके मुक्त कमैयाहुक्रनके सहभागिता रहल रहे ।
कैलारी ओ जोशीपुर गाउँपालिकासे आज सार्वजनिक विदा
२४ औ मुक्त कमैया दिवसके अवसरमे कैलाली जिल्लाके कैलारी गाउँपालिका ओ जोशीपुर गाउँपालिका आज सार्वजनिक विदा डेले बा ।
दुनु पालिकासे मुक्त कमैयाुहनके सम्मानक लाग आजुक दिन मुक्ती हुइल दिनमे शुभकामना व्यक्त करटी सार्वजनिक विदा डेना निर्णय करल रहे । कमैया मुक्तीके दिवसके अववसरमे कैलारी गाउँपालिकाके अध्यक्ष राजसमझ चौधरी ओ जोशीपुर गाउँपालिकाके अध्यक्ष चित्रबहादुर चौधरी कमैया मुक्ती दिवसके अवसरमे सक्कु मुक्तकमैया डाडुभैयाके शुभकामना व्यक्त करल रहिट ।
आज दुनु पालिकामे सरकार तथा गैरकारी कार्यालय, विद्यालय तथा वित्तीय संस्थामे विदा रना जनागिल बा ।
ओस्टेक करके मुक्तकमैयाहुक्रे आज अलग अलग स्थानमे मुक्ती दिवस मनैटी रहल बटै ।
