घुरहा पुल मर्मतके लाग मुख्यमन्त्रीहे ज्ञापनपत्र

पहुरा समाचारदाता
धनगढी, २४ सावन । कैलारी गाउँपालिका वडा नम्बर ४ के कार्यालयसे घुरहा पुल मर्मतके लाग सुदूरपश्चिम प्रदेश सरकारके मुख्यमन्त्री कमलबहादुर शाहहे विफेक रोज ज्ञापनपत्र बुझागिल बा ।

कैलारी गाउँपालिका वडा नं ४ ओ ६ जोरना घुरहा पुल जिर्ण हुके आवातजावतमे समेट बन्द हुइलपाछे ओकर मर्मतके लाग मुख्यमन्त्रीहे ज्ञापनपत्र बुझाइल वडा नम्बर ४ के वडा अध्यक्ष ठागुराम चौधरी बटैलै । पुल मर्मतलगायत समस्याके टमान समस्याबारे वडाके टिम सहभागी हुके ज्ञापन बुझाइल उहाँ बटैलै ।

ज्ञापनपत्र बुझैना कार्यक्रममे वडा अध्यक्ष नेतृत्वके टोलीमे कार्यपालिका सदस्य लाल बहादुर चौधरी, वडा सदस्य लक्ष्मी चौधरी, हरिद्वारी चौधरी, सुवा परियारलगायतके सहभागिता रहे ।

असार टिसरा सात निरन्तर बरसल पानीसे घुरहा लडियामे आइल बाढसे उ पुलके पुरुव ओर कटानी करके पुल नग्ना जोखिम बह्रल बा ।

पुल निर्माण कम्पनीसे निर्माण सम्पन्न करेबेर पुरुव ओरके पंखा नइबनाके अधुरा छोरलपाछे प्रत्येक बरसके बाढसे जोखिम बह्रैटी आइल कैलारी वडा नम्बर ४ के वडा अध्यक्ष चौधरी बटैलै ।

उहाँ कहलै, ‘गाउँपालिकाके आर्थिक सहयोग प्रत्येक बरस बाँस, कट्टा, माटी, ग्राभेलसे मर्मत करके वारवार कैना अवस्था बनाजाइठ । बर्खा अइटीकी पुहाके लैजाईठ ।’ एक बरषमे टमान चो मर्मत कैना बाध्य बाटी, वडा अध्यक्ष कहलै, ‘ओटरासे नइपुग्ना ओरसे संघीय या प्रदेश सरकारके भारी बजेटसे तटबन्धसहिट मर्मत करे पर्ना अवस्था बा । स्थानीय सरकारके बजेट नइभियाई । उ पुलके दिर्घकालिन समस्या समाधानके लाग प्रदेश ओ संघीय सरकारसे बजेट भारी बजेट विनियोजना करे पर्ना अवस्था जरुरी बा ।’

उहाँ कहलै, ‘पुल मर्मतके लाग बजेट विनियोजना कैडेना कहटी दर्जनौ फेरा प्रदेश ओ संघीय सरकारहे ज्ञापनपत्र, ध्यानाकर्षणपत्र बुझासेकल मने बजेट विनियोजन नइकरलपाछे सालोसाल समस्या आइल हो ।’

अब्बेफे पैठल यात्रा बाहेक वारबार कैना अवस्था नइरहल वडा अध्यक्ष बटैलै । उ पुल संघीय सरकारके सहयोगमे २०६७ सालमे निर्माण हुइल हो ।