शिक्षासंग्गे संस्कार सिखाइक लाग बोण्डसे गुरही कार्यक्रम

पहुरा समाचारदाता
हसुलिया, २५ सावन । कैलाली जिल्लाके कैलारी गाउँपालिका वडा नम्बर ५ पवेरामे रहल बोण्ड इगलिस बोर्डिङ स्कूलसे शिक्षासँगे संस्कार सिखाइक लाग गुरही टिहुवार मनैले बा ।

थारु समुदायसे मनाजैना गुरही टिहुवार शुकके रोज विद्यालयमेफे मनागिल विद्यालयके संस्थापक प्रिन्सिपल तिलक बोहरा बटैलै । उहाँ कहलै, ‘गुरही टिहुवारके बारेमे कितावी ज्ञानसंगसंगे प्रत्यक्ष व्यवहारमे कराके डेखैले विद्यार्थीहुक्रन बुझना झन सहजुल हुइना ओ संस्कार, संस्कृतिके संरक्षणमे टेवा पुगठ ।’

विद्यार्थीनहे गुरहीबारे जानकारी संगे गुरही अस्रैना ओ सांस्कृतिक कार्यक्रमफे कैगिल उहाँ बटैलै । प्रिन्सिपल बोहरा अइना दिनमे और समुदायके पर्व संस्कृतिबारे जानकारी डेहक लाग यी मेरिक कार्यक्रमहे निरन्तरता डेना बटैलै । गुरही अस्रैना कार्यक्रममे विद्यालयमे पह्रना थारु ओ गैरथारु समुदायके विद्यार्थीनके सहभागिता रहे ।