संस्कृतिहे बचाइक लाग पुस्तान्तरण जरुरी बाः गाउँपालिका अध्यक्ष

पहुरा समाचारदाता
हसुलिया, २५ सावन । कैलालीके कैलारी गाउँपालिकामे शुकके रोज विशेष कार्यक्रमसहित गुरही टिहुवार मनागिल बा ।
नेपाल सांस्कृतिक महासंघ कैलारीके आयोजना तथा कैलारी युथस यूनाइटेड क्लव ओ हसुलिया गाउँ समाजके सह आयोजनामे गुरही विशेष कार्यक्रम कैगिल हो ।

गुरही विशेष कार्यक्रममे वरका पहुना कैलारी गाउँपालिका अध्यक्ष राजसमझ चौधरी रहल रहिट । कार्यक्रममे सम्बोधन करटी उहाँ संस्कृतिहे बचाइक लाग पुस्तान्तरण जरुरी रहल बटैलै । उहाँ कहलै ‘थारु समुदायमे बाहै्र महिना मेरमेराइक टरटिहुवार परठ । महिना सिजन अनुसार गीतबाँस गाजाइठ । अब्बे बहुटट लोप हुइटी बा । हम्रे उहीहे जिवित राखे चाहल बाटी । उहीहे जिवान्त राखेक लाग लौवा पुस्तामे सारे पर्ना जरुरी बा ।’

हरेक समुदाय आ अपन टरटिहुवार नैछोरके मनैठै । बहुट जैसिन टरटिहुवार परमार्जित हुइटी गैल बा । पहिचानहे जोगाइक लाग मौलिक संस्कृृतिहे जोगाइक लाग निरन्तरता डेना जरुरी रहल उहाँ बटैलै ।

कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी गुरही टिहुवार मनैले रोगविरोग हटना जनविश्वास रहल बटैली ।

यी टिहुवारके अपने खालके मान्यता बा, यी टिहुवार जनस्वास्थ्यसेफे जोरल बा’, उहाँ कहली, ‘आर्थिक बर्षके सुरुवाट हुइलपाछेक थारु समुदायके पहिल टिहुवार गुरही हो । बर्खायाम ढेर किराकाँटी, रोगविरोग डेखा परठ । गुरही मनैलेसे यिहीसे छुटकरा मिलठ, दुर हुइठ कना मन्यता रख्टी गुरही मनैटी आगिल बा ।’

पुर्खानके ज्ञान हस्तान्तरण हुई नैसेकल हो, कला, संस्कृति हमार पहिचानसे जोरल अब्बेक पुस्ताहे उ सक्कु पुस्तान्तरण कैना जरुरी रहलफे उहाँ बटैली ।

कार्यक्रममे वडा नम्बर ३ वडा अध्यक्ष सन्तराम चौधरी, वडा नम्बर ४ वडा अध्यक्ष ठागुराम चौधरी गुरही टिहुवारके शुभकामना डेटी संस्कृति संरक्षणके सक्कु जाने लागे पर्ना जरुरी रहल बटैलै ।

नेपाल सांस्कृतिक महासंघ कैलारीके अध्यक्ष सविता चौधरीके अध्यक्षतामे कार्यक्रममे वडा सदस्य किसनलाल चौधरी, भागदास चौधरी, हसुलिया गाउँक भल्मसालगायतके सहभागिता रहे । कार्यक्रमके संचालन मन्जु चौधरी करल रही ।