आरडिएनके रजत समारोह निम्जल

पहुरा समाचारदाता
धनगढी, ६ भदौ । राष्ट्रिय दलित नेटवर्क (आरडिएन) के २५ औं स्थापना दिवस बिफेक रोज धनगढीमे सम्पन्न हुइल बा । सुदूरपश्चिम प्रदेशक आन्तरिक मामिला तथा कानून मन्त्री हिरासिंह सार्कीके बरका पहुनामे हुइल कार्यक्रममे उहाँ दलित समुदायके लाग चुनावमे प्रत्यक्ष आरक्षणके व्यवस्था हुई पर्ना बटैले बटै ।
मन्त्री सार्की शताब्दीयौसे पाछे पारल दलित समुदायहे क्षतिपूर्तिसहितके आरक्षण आवश्यक रहल बटैले बटै । उहाँ सीप तथा कलामे निपुर्ण दलित समुदाय वास्तविक सामाजिक इन्जिनियर रहल चर्चा करलै ।
कार्यक्रममे प्राध्यापक डा. हेमराज पन्त शिक्षा ओ आर्थिक समृद्धिसे जातीय छुवाछूत कम कैना महत्वपूर्ण भूमिका निर्वाह कैना चर्चा करलै ।
रजत समारोहमे आरडिएनके संस्थापक तथा प्रदेश नीति आयोगके उपाध्यक्ष गणेशबहादुर विश्वकर्मा जटराफे उन्नत राज्य व्यवस्था अइलेसे जातीय छुवाछूत कायम रहल बिडम्बनापूर्ण अवस्था रहल बटैलै ।

कार्यक्रममे प्रदेश सभा सदस्य लक्ष्मी बिक ओ ललिता सुनार, संविधान सभा सदस्य हरि श्रीपाइली लगायतसे शुभकामना मन्तव्य व्यक्त करल रहिट ।
समारोहमे दलित नेता छत्रबहादुर टेलरहे टिकाराम पार्की पुरस्कार प्रदान कैगिल बा । उ अवसरमे दलित आन्दोलनमे टमान क्षेत्रसे योगदान पुगैना व्यक्ति तथा संस्थाहे सम्मान कैगिल रहे ।
आरडीएनके अध्यक्ष मोहन ओडके अध्यक्षतामे हुइल समारोहके सञ्चालन संस्थाके महासचिव पार्वती आग्री करल रहिट ।
