थारु टेलिभिजन नयाँ व्यवस्थापनके साथ संचालन हुइना

पहुरा समाचारदाता
धनगढी, १६ भदौ । कैलालीके धनगढीमे कुछ बरस आघेसे परिक्षण प्रशारण करल थारु टेलिभिजन आव सुदूरपश्चिम प्रदेशमे पहिल चो स्याटे लाईटसे लौव व्यवस्थापनके साथ हाली प्रशारण सुरु कैना तयारीमे जुटल बा ।

शनिच्चरके रोज धनगढीमे थारु टेलिभिजनके संचालकहुक्रे थारु समुदायके अगुवा तथा बृद्धिजिवीहुकनसे छलफल करटी दिगोपना ओ कैसिक मजा बनाइ सेक्ना कटी सुझाव सल्लाह लेहल रहिट । थारु टेलिभिजनके अध्यक्ष पोखम चौधरीके अध्यक्षतामे हुइल कार्यक्रममे यी टेलिभिजनके प्रसारण रणनीतिबारे जानकारी डेहल रहिट ।

टेलिभिजनके कार्यकारी निर्देशक कुन्नु नारायण चौधरी स्वागत मन्तव्य व्यक्त करटी थारु समुदायके लगानीमे नमस्ते सहकारी स्थापित होसेकल कहटी थारु समुदायके भाषा, कला, संस्कृतिहे संरक्षणके लाग थारु टेलिभिजन संचालन हुइ जैटी रहल बटैलै । यी टेलिभिजन प्रालिमे जैटी रहल ओर शेयर सदस्य खुला करल बटैलै । टेलिभिजनसे संचालकके लाग २ लाख ५० हजारके शेयर लेहे पर्ना जनैले बा ।

टेलिभिजनके संचालक बुन्दीलाल चौधरी समय ओ दर्शकके माग अनुसार आघे बह्रना प्रसाय करल बटैलै । टेलिभिजनके संचालकमे चन्द्रसिंह चौधरी, मनमति बखरियालगायतके रहल बटै । टेलिभिजनसे समाचार, मनोरन्जन, थारु समुदायके कला, संस्कृति, अन्तरवार्ता, थारु समुदायके परम्परागत ज्ञानगुन बाट, पुर्खनके सीपलगायत सुदूरपश्चिम प्रदेशके और समुदायके रिति संस्कृतिबारे प्रशारण कैना जनैले बा । छलफल कार्यक्रममे कैलाली कञ्चनपुरके थारु समुदायके अगुवाहुकनके सहभागिता रहे । कार्यक्रमके संचालन रविना चौधरी करल रही ।