मानव अधिकारके अवस्थामे सुधार नैआइल’

‘पहुरा समाचारदाता
धनगढी, २६ भदौ । मानव अधिकारके अवस्थामे सुधार नैआइल मानव अधिकार रक्षकहुक्रे बटैले बटै ।

राष्ट्रिय मानव अधिकार आयोग सुदूरपश्चिम प्रदेश कार्यालयके आयोजनामे बुधके रोज धनगढीमे मानव अधिकार आयोगके छैटौं रणनीतिक योजना (२०२१–२०२६), नेपाल सरकारके मानव अधिकार सम्बन्धी पाँचौ राष्ट्रिय कार्ययोजना (२०७७÷७८–२०८१÷८२) ओ सुदूरपश्चिम प्रदेशके मानव अधिकारके टमान सवालमे सहकार्य, समन्वय तथा भावी कार्यदिशा सम्बन्धमे कैगिल छलफल कार्यक्रममे मानव अधिकार रक्षकहुकनसे उ ओसिन बत्वाइल रहिट ।

राष्ट्रिय मानव अधिकार आयोगके प्रदेश प्रमुख प्रकाशदत्त भट्टके अध्यक्षतामे हुइल कार्यक्रममे सहजीकरण मानव अधिकार आयोगके उपसचिव झंकरबहादुर रावल करल रहिट । मानव अधिकार सम्बन्धी कार्य प्रदेश सरकारसे १३७ ठो, स्थानीय तहसे १३१ ठो ओ मानव अधिकार आयोगसे १०६ ठो करे पर्ना रहल बा ।

कार्यक्रममे अपन बाट रख्टी मानव रक्षकहुक्रे प्रदेश ओ स्थानीय सरकारसे मानव अधिकार सम्बन्धी करेपर्ना कार्य पुरा नैकरल आरोप लगैले बटै । जिहीसे अल्पसंख्यक, पाछे परल वर्ग समुदाय अपने पाई अधिकारसे बञ्चित रहल बटैले रहिट ।

कार्यक्रममे अधिवक्ता पुष्पविक्रम शाही, निडस नेपालके प्रकाश चन्द्र मडै, अधिवक्ता जोहारीलाल चौधरी, फाया नेपालके अध्यक्ष गोमा आचार्य, द्धन्दपीडित साझा चौतारीके प्रदेश संयोजक गणेश मल्ल, फाया नेपालके धनपति ढुङेल, राष्ट्रिय अपाङ महासंघ प्रदेश अध्यक्ष मानबहादुर साउद, दलित महिला अधिकार मञ्चके अध्यक्ष सावित्रा घिमिरे, इन्सेक प्रलेख अधिकृत कृष्ण विक, पीसविनके हर्कबहादुर ओली, फेडो कैलालीके विनोद घिमिरे, याक नेपालके बलबहादुर रोकाय, नेफिन प्रदेश अध्यक्ष दलबहादुर घर्ती, डब्लुएचआरके वेद अवस्थी, थाकस कञ्चनपुरके सभापति सानु चौधरी ओ नेपाल पत्रकार महासंघ कैलालीके अध्यक्ष हिमालय जोशी लगायत अपन बाट राखल रहिट ।

कार्यक्रमके संचालन राष्ट्रिय मानव अधिकार आयोग सुदूरपश्चिम प्रदेश कार्यालयके मानव अधिकार अधिकृत विदेशराम चौधरी करल रहिट ।