लडिया धार परिवर्तनसे पुल जोखिममे
पहुरा समाचारदाता
धनगढी, ८ कुँवार । लडिया धार परिवर्तन करलपाछे झोलुंगे पुलमे जोखिममे परल बा ।
कैलालीके गोदावरी नगरपालिका–९ धनचौरी ओ धनगढी उपमहानगरपालिका वडा नम्बर १७ धुरझन्ना जोर्ना खुटिया लडियामे बनल झोलुंगे पुल जोखिममे परल हो । पुलके पुरुब ओर निरन्तर कटान कैटी रहल ओरसे समयमे तटबन्ध नैकैलेसे पुल आउर जोखिममे पर्ना स्थानीयहुक्रे बटैले बटै ।
धुरझन्ना गाउँके पूर्व भलमन्सा आशाराम चौधरी लडियामे समयमे तटबन्ध नैकैलेसे पुल पुहके जाइ सेक्ना बटैलै । स्थानीय ज्ञानेन्द्र चौधरी लडियासे जथाभावी गिट्टीबालु उत्खनन्से लडिया आपन धार परिवर्तन करल बटैलै । स्थानीहुक्रे पुल बचाइक लाग तट्बन्धके माग कैटी लडियासे बालुगिट्टी उत्खनन्मे रोक फेन लगैले बाटै । लडियासे धनगढी उपमहानगरपालिका गिट्टीबालुके रोयल्टी उठैटी आइल बा ।
स्थानीय बिशाल बोहरा पुल बचाइक लाग धनगढी उपमहानगरपालिकासे तत्काल तटबन्ध करे पर्ना जोड डेलै । उहाँ तट्बन्धके काम आघे नैबह्राइटसम धनगढी उपमहानगरहे गिट्टीबालु उठाइ नैडेना बटैलै ।
स्थानीय हर्षराज राना पुल ओ स्थानीयहुक्रनके खेटबारी बचाइक लाग धनगढी उपमहानगरसे पहिलेसे तटबन्धके माग कैटी आइल बटैलै । उपमहानगरसे तटबन्धके लाग आश्वासन डेना मने समयमे काम नैकरल ओरसे पुल जोखिममे पर्नाके साथे गाउँक स्कूल लगायत स्थानीयके जग्गा जमिन, खेटबारी कटान पटान हुइल बटैलै ।
इहे बिच धनगढी उपमहानगरपालिकाके डिभिजनल इन्जिनियर दिजराज भट्टके नेतृत्वमे सोम्मारके रोज पुलके अनुगमन करल बा । अनुगमन पश्चात इन्जिनियर भट्ट पुल बचाइक लाग तत्काल लडियाके धार परिवर्तन करे पर्ना बटैलै । ओकर लाग जिल्ला समन्वय समिति लगायत अन्य निकायसे समन्वय सहकार्य सहित आघे बह्रना फेन बटैलै ।
साथे उहाँ पुल लगायत स्थानीयहुक्रनके खेट्वाबारीहे डुबान कटानके समस्यासे बचाइक लाग जनताके तटबन्ध कार्यक्रम सहित लावा योजनाके लाग फेन पहल कैना प्रतिवद्धता जनाइल रहिट ।
अनुगमन कार्यक्रममे धनगढी उपमहानगरपालिका वडा नम्बर १७ के वडा अध्यक्ष माधव राज राना, उपमहानगरके कर्मचारी, बरघर भलमन्सा, समाजसेवी वुद्धिजिवीहुक्रनके सहभागिता रहल रहे ।
