कैलारीमे विपद टास्कफोर्सहे आत्मसुरक्षा तालिम
पहुरा समाचारदाता
हसुलिया, ९ कुवाँर । टास्क फोर्स ओ समुदायके अगुवाके लाग आत्मसुरक्षा सम्बन्धी ३ दिने तालिम कैलारी गाउँपालिकामे बुधसे शुरु हुइल बा ।
कैलारी गाउँपालिकाके समन्वयमे केर्क इन एक्टके आर्थिक सहयोग तथा कार्डिएडके प्राविधिक सहयोगमे बहुउद्देश्यीय विकास समाज (एमपीडिएस) डडेल्धुरासे संचालित प्रकोप जोखिम न्यूनीकरणके लाग सुदूरपश्चिम प्रदेशमे बाढ पहिरो प्रभावितहे सहयोग कार्यक्रम अन्तर्गत बाढ तथा डुबान प्रभावित क्षेत्रमे स्थानीय श्रोत साधनके प्रयोग मार्फत विपद जोखिम न्यूनीकरणमे स्थानीय समुदाय ओ टास्कफोर्सके ज्ञान सीप ओ क्षमता अभिवृद्धि कैना उद्देश्यसे उ तालिम आयोजना करल हो ।
तालिमके एक कार्यक्रमके विच कैलारी गाउँपालिका अध्यक्ष राजसमझ चौधरी उदघाटन करल रहिट । उदघाटन कार्यक्रममे सम्बोधन करटी उहाँ कैलारीके लडिया तटिया क्षेत्र सबसे बाढके जोखिममे रहल बटैलै । यी बरषके बाढसे कैलारीके वडा नम्बर ३, ५, ७ ओ ८ सबसे प्रभावित हुइल बटैलै । फेरसे मनसुन सक्रिय हुइल ओरसे उहीसे सजग रना आग्रह करलै । अब्बेक मनसुनसे किसानहे सबसे ज्यादा नोक्सानहुकनके नोक्सान पुग्ना बटैलै ।
कार्यक्रममे कैलारी गाउँपालिका वडा नं ४ के अध्यक्ष ठागुराम चौधरी लगायतसे मन्तव्य कैटी विपद टास्कफोर्सहे आत्मसुरक्षा तालिमसे विपद जोखिम न्यूनिकरणमे टेवा पुग्ना बटैलै । उदघाटन कार्यक्रममे प्रमुख प्रशासकीय अधिकृत खगेन्द्रराज जोशीलगायतके सहभागिता रहे ।कार्यक्रमके संचालन संस्थाके डिआआर टेक्निकल एक्सपोर्ट अफिसर राजेन्द्र रैका करल रहिट ।
तालिममे कैलारी गाउँपालिकाके ९ वडाके टास्कफोर्स ओ समुदायके अगुवा करके २५ जानेक सहभागीता रहल बा । ३ दिने उ तालिमके सहजीकरण रतन टमट्टा ओ चन्द्र साउँद सहजीकरण करटी रहल बटै ।
