कुवाँर १५ गतेसे फेरसे कोभिड–१९ विरुद्धके खोप लगैना
पहुरा समाचारदाता
धनगढी, १० कुवाँर । कैलालीके १३ स्थानीय तहमे यिहे कुवाँर १५ गतेसे कोभिड–१९ विरुद्धके खोप अभियान संचालन हुइना जनागिल बा ।
स्वास्थ्य कार्यालयके आयोजनामे विफेक रोज धनगढीमे प्रमुख जिल्ला अधिकारी धर्मेन्द्रकुमार मिश्रके अध्यक्षतामे हुइल बैठकसे सुदूरपश्चिम प्रदेश सरकार सामाजिक विकास मन्त्रालय स्वास्थ्य निर्देशनालय राजपुर डोटीके पत्रानुसार कोभिड संक्रमणके जोखिम विधामान रहल ओरसे खोप अभियान संचालन कैना निर्णय कैगिल हो ।
अइटी रहल चाडपर्वके समयमे मनैनके आवाटजावत ढेर हुके कोभिडके संक्रमण बह्रे सेक्ना अवस्थाहे मध्यनजर कैके १२ बरससे उप्पर उमेर रहल १३ स्थानीय तहमे कोभिड–१९ विरुद्धके खोप अभियान संचालन कैना निर्णय हुइल बा ।
कुवाँर ११ गते प्रदेश स्वास्थ्य आपूर्ति व्यवस्थापन केन्द्र धनगढीसे कैलाली जिल्लाके लाग प्राप्त हुइना Pfizer-BioNTEch Mono-valent ‘‘Adult/child’’३५ हजार डोज स्थानीय तहके माग तथा जनसंख्याके आधारमे १३ स्थानीय तहमे कोल्ड–चेन व्यवस्थापन सुनिश्चित हुइना करके यिहे १२ गते खोप तथा खोप सामाग्री वितरण कैना जनागिल बा ।
जेम्ने धनगढी उपमहानगरपालिकाहे ५ हजार डोज, कैलारी गाउँपालिकाहे २ हजार डोज, भजनी नगरपालिकाहे ३ हजार डोज, टीकापुर नगरपालिकाहे ५ हजार डोज, जोशीपुर, जानकी गाउँपालिकाहे एक÷एक हजार डोज, लम्कीचुहा नगरपालिकाहे ७ हजार डोज, बर्दगोरिया गाउँपालिकाहे २ हजार डोज खोप वितरण कैना बा ।
ओस्टेक करके घोडाघोडी नगरपालिकाहे एक हजार डोज, गौरीगंगा, गोदावरी नगरपालिकाहे ३÷३ हजार डोज, चुरे, मोहन्याल गाउँपालिकामे एक÷एक हजार डोज खोप वितरण कैना जनागिल बा ।
कोभिड–१९ अभिनफे छुटपुट अवस्थामे विल्गैटी रहल ओरसे पहिलेसे सर्तकता अपनैना जरुरी रहल कहटी यी खोप अभियानहे सफल बनैना सक्कु जाने लागे पर्ना प्रमुख जिल्ला अधिकारी मिश्र बटैलै ।
उहाँ कहलै, ‘अब्बे चाडपर्वफे अइटी बा । मनैनके आवाट जावटफे बह्री, कोभिड–१९ के संक्रमण डर लग्टी अवस्था टे नैहो मने विगतके घटनाहेफे मध्यनगर करके विस्राई नैपरल । अब्बेसे सचेत रहलेसे काल्हके दिनमे मजा रही ।’
सरोकारवाला निकायके बैठकमे सहायक प्रजिअ किरण जोशी, जिल्ला प्रहरी कार्यालय कैलालीके प्रमुख प्रहरी उपरिक्षक पदम बहादुर विष्ट, शिक्षा समन्वय इकाई कैलालीके बैकुण्ठ सुवेदी, जिल्ला प्रशासन कार्यालय कैलालीके प्रशासकीय अधिकृत शिवराज जोशी, जिसस कैलालीके विमल प्रकास जोशी, धनगढी उपमहानगरपालिकाके जनस्वास्थ्य निरिक्षक योगेश अवस्थी, सेती प्रादेशिक अस्पतालके मेसु शेरबहादुर कमर, स्वास्थ्य कार्यालय कैलालीके तालिम अधिकृत गौरी जोशी, स्वास्थ्य कार्यालय कैलालीके खोप सुपरिवेक्षक प्रदीप जोशी, जनस्वास्थ्य निरिक्षक तेज विक्रम शाही, अधिकृत जनकराज जोशी, सिअनमी रमा गिरी, रमेश अवस्थीलगायत सहभागिता रहे ।
