भजनीमे निःशुल्क स्वास्थ्य शिविर

पहुरा समाचारदाता
धनगढी, २० कुँवार । भनजी नगरपालिका वडा नम्बर ५ कुटीमे निःशुल्क स्वास्थ्य शिविर आयोजना करल बा । स्वास्थ्य शिविरमे ३५० जाने सेवा लेहल बाटै । नेपाल औषधी व्यवसायी संघ ओ कैलाली अस्पतालके संयुक्त रुपमे आयोजना करल निःशुल्क स्वास्थ्य शिविरसे उक्त संख्यामे बिरामी सेवा लेहल हुइट ।

भजनी नगरपालिका–५ कुटी स्थित कर्मेश्वर माविमे शनिच्चरके हुइल स्वास्थ्य शिविरमे विशेषज्ञ सेवा सहितके डाक्टरहुक्रे बिरामीके चेकजाँच ओ औषधी निःशुल्क रुपमे बितरण करल स्वास्थ्य शिविरके संयोजक एवम औषधी व्यवसायी संघ कैलालीके उपाध्यक्ष डम्बर ऐरी बटैलै ।

ओहकान अनुसार शिविरमे ३५० से ढेर बिरामी सेवा लेहल जनैलै । कैलाली अस्पतालमे कार्यरत डाक्टरहुक्रे बिरामी चेकजाँच करल बटैटी अस्पतालके अध्यक्ष एवम सुदूरपश्चिम औषधी व्यवसायी संघके वरिष्ठ उपाध्यक्ष जनकराज जोशी बिरामीहुक्रे घरदैलोमे उपचार सेवा डेहे पाइलमे खुशी लागल बटैलै ।