धनगढीमे अपाङताके लाग पुनस्र्थापनासहितके अस्पताल सञ्चालन कैना सम्झौता
पहुरा समाचारदाता
धनगढी, १५ कार्तिक । कैलालीके धनगढीमे पुनस्र्थापनासहितके अस्पताल सञ्चालनके सम्झौता हुइल बा ।
धनगढी उपमहानगरपालिका ओ अपाङगता बाल अस्पताल तथा पुनस्र्थापना केन्द्र, काभ्रेपलान्चोकबिच सम्झौता हुइल हो ।
धनगढी उपमहानगरपालिका–७ देवहरियाके शिव माध्यामिक विद्यालयके परिसरमे रहल आधारभूत स्वास्थ्य सेवा केन्द्र ओ वर्थिङ सेन्टरके भवनमे पुनस्र्थापनासहितके अस्पताल सञ्चालनके सम्झौता करल बा ।
धनगढीमे सुदूरपश्चिम प्रदेश पुनस्र्थापना केन्द्र सञ्चालन हुइना बा । अपाङगता बाल अस्पताल तथा पुनस्र्थापना केन्द्र, काभ्रेपलान्चोकसे धनगढीमे शाखाके रुपमे अस्पतालसहितके पुनस्र्थापना केन्द्र सञ्चालन कैना सम्झौता करल धनगढी उपमहानगरपालिका जनैले बा ।
उपमहानगरपालिकाके अनुसार एक सय शय्या क्षमताके अस्पताल केन्द्रके बा । १८ वर्ष टरेक अपाङगता हुइल बालबालिकाके शल्यक्रिया लगायतके सेवा केन्द्रले डेना हुइल बा ।
धनगढीमे फिजियोथेरापीसहितके सामान्य उपचार सेवा डेना ओ शल्यक्रिया वा जटिल प्रकृतिके विरामीहुकनहे उपचारके लाग काभ्रेपलान्चोक लैजैना तयारी करल धनगढी उपमहानगरपालिकाके स्वास्थ्य शाखा प्रमुख योगेश अवस्थी बटैलै ।
सुदूरपश्चिममे अपाङगता हुइल बालबालिकाके स्वास्थ्य उपचार तथा पुनस्र्थापनाके लाग धनगढीमे केन्द्र सञ्चालन कैना उहाँ बटैलै । ओइने अर्थोपेडिक सहायता सामाग्री, अपाङगता सहायता सामाग्रीसँगे औषधीके व्यवस्थापनसमेत कैना हुइल बा । अपाङता सम्बन्धी शिक्षा तथा अभिमुखीकरणसमेत डेना हुइल बा । धनगढी उपमहानगरपालिकासे भवन दुई वर्षके लाग केन्द्रहे डेहल बा । उ केन्द्रमे आवश्यक पर्ना पानी, बिजुली, टेलिफोन तथा नेटके शुल्क भर केन्द्रसे तिरे पर्ना बा ।
