कैलारीमे प्लाष्टिक फुला विक्री वितरणमे रोक

पहुरा समाचारदाता
हसुलिया, १५ कार्तिक । कैलारी गाउँपालिकासे प्लाष्टिक फुला विक्री वितरणमे रोक लगैले बा ।

गाउँपालिका अध्यक्ष राजसमझ चौधरी एक सार्वजनिक कार्यक्रममे सम्बोधन करटी डेवारीमे भाई टिकामे प्लाष्टिक माला नैबेच्ना, नैकिन्ना आग्रह करल रहिट । उहाँ कहलै, ‘स्वास्थ्यके दुष्टिकोणसे, वातावरण प्रदुशनके दृष्टिकोणसे प्लाष्टिक माला नैमजा हो । यी बाटमे सक्कु जाने सचेत हुइना जरुरी बा ।’

भाई टिकामे घालल प्लाष्टिक फुला घालके फेक्डेले नैसरना हुइल ओरसे वातावरण प्रदुशन हुइनाके साथे मानव स्वास्थ्यमे असर परटी रहल उहाँ बटैलै ।

गाउँघरमे अब्बे गेन्डा फुला प्रसस्त रहल ओ केक्रो घर नैरहलेसे प्लाष्टिक फुलाके सट्टा गेन्डा फुला किन्के माला बनैना उहाँ आग्रह करलै ।

गाउँपालिका उपाध्यक्ष भगवतीकुमारी चौधरी सेकटसम डेवारीमे माला बनाइक लाग घर–घर फुला लगाके ओक्रे प्रयोग कैना मजा रहल बटैली । उहाँ कहली, ‘कैलारी गाउँपालिकाके समन्वयमे सहास नेपालके सहयोगमे वडा नम्बर ४ के गाउँ, वडा नम्बर ३ ओ वडा नम्बर ७ मे फुला खेती कैगिल बा । उहीसे आम्दानीके स्रोत ओ वातावरण सन्तुलन बनैनामे टेवा पुगल बा ।’
फुला व्यवसायीहुक्रे भाई टिकाके लाग प्रसस्त फुला उत्पादन हुइल बटैलै । उहाँहुक्रे प्लाष्टिक फुलाके सट्टा गाउँघरमे उत्पादन हुइल सयपत्री (गेन्डा) फुलाके माला प्रयोग कैना आग्रह करलै ।