प्रदेश सरकारसे सय दिनके उपलब्धी सार्वजनिक
पहुरा समाचारदाता
धनगढी, २७ कात्तिक । मुख्यमन्त्री कमलबहादुर शाह नेतृत्वके सुदूरपश्चिम प्रदेश सरकारसे एक सय दिनके उपलब्धि सार्वजनिक करले बा ।
मुख्यमन्त्री तथा मन्त्रिपरिषद्के कार्यालयमे मंगरके पत्रकार सम्मेलनके आयोजना कैके सरकारसे एक सय दिनके उपलब्धि सार्वजनिक करल हो । शाहके नेतृत्वमे गत सावन २१ गते प्रदेश सरकार गठन हुइल रहे ।
एक सय दिनके अवधि शासकीय दृष्टिसे राजनीतिक, आर्थिक ओ प्रशासनिक पक्षमे उपलब्धिमूलक रहल मुख्यमन्त्री शाह बटैलै । उ अवधिमे प्रदेश सरकारसे प्रदेशभिट्टर वित्तीय पारदर्शीता, सुशासन प्रवद्र्धन, भ्रष्टाचार न्यूनीकरण तथा समग्र सेवा प्रवाह, विकास निर्माण ओ राजस्व संकलन लगायत नागरिक सरोकारके विविध पक्षमे केन्द्रित रहीके काम करल उहाँके कहाइ रहल बा ।
एक सय दिनके अवधिमे प्रदेश सरकारसे सुदूरपश्चिम प्रदेश लैङ्गिक समानता तथा सामाजिक समावेशीकरण नीति २०८१, अपाङ्गता सम्बन्धी प्रादेशिक नीति २०८१ बनैले बा । ओस्टके, प्रदेश सभासे पाँच ऐन निर्माण हुइल बावै । प्रदेश निजामती सेवा–पहिलो संशोधन) ऐन, २०८०, सुदूरपश्चिम प्रदेश आर्थिक ऐन, २०८१ ओ सुदूरपश्चिम प्रदेश विनियोजन ऐन, २०८१, सामयिक राजस्व संकलन सम्बन्धी ऐन २०८१, प्रदेश विपद् जोखिम न्यूनीकरण तथा व्यवस्थापन ऐन २०७५ हे संशोधन कैना बनल विधेयक (पहिलो संशोधन) २०८१ प्रदेश सभासे पारित हुइल हो ।
सुदूरपश्चिम प्रदेश स्थानीय सेवाके गठन, सञ्चालन ओ सेवाके सर्त सम्बन्धमे व्यवस्था कैना बनल विधेयक प्रदेश सभामे दर्ता होके विचाराधिन अवस्थामे रहल प्रदेश सरकार जनैले बा । ओस्टके, प्रदेश निजामती सेवा नियमावली २०८१ के मस्यौदा तयार कैके सुझावके लाग मन्त्रालयमे पठाइल जनैले बा ।
सुदूरपश्चिम प्रदेश निजामती कर्मचारी सरुवा तथा काज सम्बन्धी –पहिलो संशोधन) मापदण्ड, २०८१, सुदूरपश्चिम प्रदेशके आर्थिक बरस २०८१–८२ के बजेट ओ उहीहे सम्बन्धित टमान मार्गदर्शन निर्माण कैके सरकारसे कार्यान्वयनमे लन्ले बा । ओस्टके, राष्ट्रिय व्यावसायिक योग्यता प्रणाली कार्यान्वयन कार्यविधि २०८० कार्यान्वयनमे लन्ले बा ।
सय दिनके अवधिमे ८.०२ प्रतिशत बजेट खर्च करल सरकार जनैले बा । आजके मितिसम ३८ करोड ४५ लाख ३० हजार अर्थात लक्ष्यके तुलनामे २३.९३ प्रतिशत राजस्व परिचालन करल जनाइल बा ।
सरकारसे भौतिक पूर्वाधार ओर एक सय दिनमे १८.५ किलोमिटर सडक कालोपत्रे, २७ किलोमिटर सडक ग्राभेल करले बा । ओस्टके, दुईठो पक्की पुल निर्माण, झोलुङ्गे पुल निर्माणके लाग १६ हजार मिटर लट्ठा खरिद, आठ खानेपानी योजना ओ डुईठो कभर्ड हल निर्माणके कार्य सम्पन्न करले बा ।
अपने सोचल ओ कल्पना करल ७० प्रतिशत किल पूरा हुइलमे उ ढेर उपलब्धि हुइना मुख्यमन्त्री शाह बटैलै । टोकल स्थानमे प्रदेश राजधानी कार्यान्वयन नैहुइलेसे ओकर विकल्प खोज्न ढिला नैकैना उहाँ उल्लेख करलै ।
हिउँदे अधिवेशनमे राजधानीको विषय प्रवेश पैना उल्लेख कैटी मुख्यमन्त्री शाह सक्कु जनहनके सहमतिमे राजधानी टोक्ना बटैलै । ओस्टके, सेती प्रादेशिक अस्पतालहे संघमे हस्तान्तरण कैके उहीहे दशरथचन्द स्वास्थ्य विज्ञान विश्वविद्यालयमे गभ्ना ओ शैक्षिक कार्यक्रम आघे बह्रैना मेरके प्रक्रिया सुरु करल जानकारी डेलै ।
