कैलारीमे वडा स्तरीय मेलमिलापकर्र्ताहुकनसे छलफल ओ अन्तरक्रिया
पहुरा समाचारदाता
हसुलिया, २८ कार्तिक । कैलारी गाउँपालिकामे सूचिकृत हुइल वडा स्तरीय मेलमिलापकर्ताहुकनसे छलफल ओ अन्तरक्रिया कार्यक्रम कैगिल बा ।
कैलारी गाउँपालिका न्यायिक समितिके आयोजनामे न्यायिक समिति संयोजक तथा गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे गाउँपालिका अध्यक्ष राजसमझ चौधरी बरका पहुना रहल रहिट ।
कार्यक्रममे सम्बोधन करटी उहाँ मेलमिलापकर्ताहुकनके काम निश्पक्ष रुपमे छलफल रहल बटैलै । उहाँ कहलै, ‘गाउँपालिकामे न्यायिक समितिफे बा । न्यायिक समितिमे बादविवाद ढेर हुइल बेला बादविवादके हलहाली समधान होए कहिके वडा स्तरीय मेलमिलाप केन्द्रमे पठाजाइठ । मेलमिलापकर्ताहुक्रे समाधान कैना विवादहे न्यायिक समितिसे समन्वय करके टुगो जरुरी रहठ ।’
गाउँपालिका उपाध्यक्ष भगवतीकुमारी चौधरी वडा–वडामे स्थापना हुइल मेलमिलाप केन्द्रसे न्यायिक समिति तथा जिल्ला अदालतहे सहजुल हुइल बटैली । उहाँ कहली, ‘सरकारीबादी, जटिल खालके मुद्दा बाहेक छोट–छोट बादविवाद सेकटसम गाउँघरमे मिलैना हो । जिल्ला अदालतसम गैलेसे ढेर झमेला ओ खर्चहा हुई सेकठ ।’
दुनु पक्षके जित ओ मन मिलैना मेरिक बादविवाद मिलैलेसे मजा रना नैहुके विवाद फेरसे उटलके आशान्ति हुइना उहाँ बटैली । मेलमिलाप कर्तासे निश्पक्ष रुपमे बादविवाद मिलाई सेकिट कहिके न्यायिक समितिसे तालिमसे डेसेकल उहाँ जनैली ।
वडा स्तरीय मेलमिलापकर्र्ताहुकनसे छलफल ओ अन्तरक्रिया कार्यक्रममे गाउँपालिकाके न्यायिक समितिमे सुचिकृत हुइल मेलमिलाप कर्ताहुकनके सहभागिता रहे । तालिमके सहजीकरण तथा प्रशिक्षण अधिवक्ता धर्मप्रकाश गिरी डेहल रहिट ।
