बादी समुदायके सीपहे आधुनिक बनैनामे जोड

पहुरा समाचारदाता
धनगढी, २९ कार्तिक । बादी समुदायहुकनके समस्याहे समाधान करेक लाग यी समुदायके सीपहे आधुनिक बनैटि जिविकोपार्जनसँग जोडे पर्ना एक कार्यक्रममे सहभागीहुक्रे बटैले बटैं ।
सञ्चार प्रतिष्ठान नेपालके आयोजना तथा सामाजिक विकास समिति प्रदेश सभा ओ यूएनडीपीके संसद सहयोग परियोजनाके समन्वय तथा सहकार्यमे विफेक रोज धनगढीमे हुइल ‘बादी समुदायके मूलभूत सवाल’ मे सामाजिक विकास समिति ओ सरोकारवालाहुकनबीच नीतिगत छलफलमे सहभागीहुक्रे अइसिक करे सेक्लेसे बादी समुदायके बृत्तिविकास हुइनामे विश्वास व्यक्त करल रहिट ।
सुदूरपश्चिम प्रदेश सभा सदस्य धर्मराज पाठक बादी समुदायलगायत अन्य दलित समुदायके समस्या समात्रानके लाग प्रदेश सरकार कार्यक्रम बनाके आघे बह्रल बटैलैं । उहाँ बादी समुदायहुकनके समस्याहे समाधान करेक लाग यी समुदायके सीपहे आधुनिक बनाइ पर्नामे जोड डेले रहैं । उहाँ बादी समुदायके समस्या समाधानके लाग प्रदेश सभामे फेन छलफल करना बटैलै ।
प्रदेश सभा सदस्य जानकी पौडेल दलित समुदायके आवश्यकता का हो ? उहिनहे प्रदेश सरकार कैसिक सम्बोधन करे सेकि यहोर ध्यान डेहे परना बटैली । उहाँ बादी समुदायके विषयमे टमान काम हुइलेसे फेन उ सुधार करे परना बटैले रहि । उहाँ कहली, “बादी समुदायके समस्या समाधानके लाग प्रदेश सरकारसे नीति नियम निर्माण करे परल । यी मै फेन महसुस करले बटु ।
प्रदेश सभा सदस्य तुलसी देवकोटा बादी समुदायके विकासके लाग प्रदेश सरकारसे बजेट छुट्याइ परनामे जोर डेहल रही । उहाँ बादी समुदाय अब्बे त्रासके जीवन बाँचल ओरसे उहाँहुकनके गाँस, बाँस, कपासके व्यवस्था करेपरना जरुरी रहल बटैली ।
अस्टेक प्रदेश सभा सदस्य लक्ष्मी विक संविधान ओ व्यवस्थासे परिकल्पना करल हरेक पाछे पारल समुदायहे मूलधारमे नाने परना बटैले रहि । उहाँ बादी समुदायहे शिक्षा, स्वास्थ्य, रोजगार, गाँस, बाँस, खाद्यके समस्या रहल ओरसे यहोर सरकारके ध्यान जाइ परना बटैले रहि ।

प्रदेश सभा सदस्य सन्तोष शर्मा बादी समुदायके समस्याहे सम्बोधन करेक लाग हम्रे खुलके बोलेपरना आवश्यक रहल बटैली । यी समुदायके समस्याहे कम करेक लाग सक्कु तहसे समन्वयकारी भूमिका सरकारसे करेपरना बटैली । उहाँ बादी तथा दलित समुदायके बृत्तिविकासके लाग रणनीति बनाके संकल्प प्रस्ताव नानके आगे बह्रैना ओर सक्कुके ध्यान जैना जरुरी रहल बटैली ।
अस्टेक, नेपाली काँग्रेसके जिल्ला सचिव नृप सुनार दलित समुदायके पीडामे रहल बादी समुदायहे मूलधारमे नानेक लाग तीनु तहके सरकार प्रयास करे परना बटैलै । यकर लाग सक्कु तहके सरकार एकीकृत नीति, कार्यक्रम बनाके काम करेपरना आवश्यक रहल उहाँ बटैलै । उहाँ कहलैं, “हालके संघीयता कलेक पीडामे रहलहे मूलधारमे नन्ना, अविकसितहे विकासित करैना, बिपन्नहे और सम्पन्न करैना यकर मूल मर्म हो ।” उहाँ बादी समुदायहे एकीकृत बस्तीमे नान्के उहाँहुकनके समस्या समाधान कैना सहज हुइना बटैले रहैं ।
निड्स नेपालके टेक विके समग्र दलित समुदाय ओ बादी समुदायके मूलभूत सवालके सम्बोधन करेक लाग उहाँहुकनके पुनःस्थापना साथे आधारभूत आवश्यकता पूर्तिके लाग सरकार नीति तथा कार्यक्रम बनाइपरना आवश्यक रहल बटैलैं ।
दलित गैर सरकारी संस्था महासंघके अध्यक्ष प्रेम विसी बादी समुदाय पाछे परनाके मुख्य कारक राज्य रहल ओरसे यकर समाधान फेन राज्यसे करे परना बटैलैं ।
यस्टेक, याक नेपालके हृदय पुजारा दलित समुदायके बालबालिका विद्यालय छोरना संख्या ढेर रहल ओरसे यी विषयमे सरकार ध्यान डेहे परना बटैलै । दलित महिला अधिकार मञ्चके अध्यक्ष सावित्रा घिमिरे बादी समुदायमे रहल बालविवाहके समस्याहे जनचेतनामूलक कार्यक्रम नान्के समाधान करे परना बटैले रहि । उहाँ बालविवाहके कारण बादी समुदायमे टमान समस्या आइल बटैली ।
गैरसरकारी संस्था महासंघ सुदूरपश्चिम प्रदेश अध्यक्ष देवी खनाल बादी समुदायके जनजीवन उकासेक लाग स्थानीय तहसे पहल करे परना बटैले । बादी समुदायके बालबालिकाहे शिक्षामे पहुँचके लाग आवासीय छात्रबृत्तिके व्यवस्था करेपरना आवश्यक रहल बटैलै ।
नेपाल पत्रकार महासंघके कैलाली जिल्ला अध्यक्ष हिमाल जोशी बादी समुदायके मूल समस्या पत्ता लगाके समस्याके निराकरण करे सेक्ना बटैलै । यकर लाग समिति बनाके सुक्ष्म रूपमे अध्ययन करेपरना बटैलै ।
गैरसरकारी संस्था महासंघ कैलालीके अध्यक्ष चेतमान साउँद अइसिन कार्यक्रममे बादी समुदायहे सहभागी करैलेसे और उपलब्धी हुइना बटैलै ।
कार्यक्रममे तपेन्द्र भुषाल बादी समुदायके सामाजिक स्तर उकासेक लाग फरक ढंगसे काम करे परना बटैलै ।
वरिष्ठ पत्रकार मनमोहन स्वार कार्यक्रमहे सहजीकरण करटी बादी समुदायके प्रमुख सवाल, बादी समुदायके हकअधिकारके लाग हुइल प्रयास, चुनौती, बादी समुदायके प्रमुख मागलगायतके बारेमे जानकारी करैले रहिट । कार्यक्रम सञ्चार प्रतिष्ठान नेपालके अध्यक्ष हेमकर्ण विकके अध्यक्षतामे हुइल रहे ।
