दार्चुलामे जिप दुर्घटनामे आठ जानेक मृत्यु
पहुरा |
३० कार्तिक २०८१, शुक्रबार

पहुरा समाचारदाता
धनगढी, ३० कार्तिक । दार्चुलामे आज बिहान जिप दुर्घटना हुके आठ जानेक मृत्यु हुइल बा ।
जिल्ला प्रहरी कार्यालय दार्चुलाके प्रमुख डीएसपी प्रकाश दाहालके अनुसार शैल्यशिखर– ५ लेकगाउँके ३० विरेन्द्र रावल, उहाँक गोसिनीया २८ वर्षीया शान्ती रावल, शैल्यशिखर–९ के ४५ वर्षीय दिलिप बिष्ट, ४५ वर्षीया मिना लेखकके दुर्घटनामे परके मृत्यु हुइल बा ।
ओस्टेक, बैतडीके डिलासैनी गाउँपालिका– ५ के १५ वर्षीय सुजित बोहरा ओ ४५ वर्षीय विरेन्द्र बोहराकेफे मृत्यु हुइल डीएसपी दाहाल बटैलै ।
मृतक दुई जाने भारतीय नागरिक रहल डीएसपी दाहाल बटैलै । यूपी (उत्तर प्रदेश) बैठना मोहम्मद सालीर ओ मोहम्मद बसीमके घटनास्थलमे मृत्यु हुइल बा ।
डीएसपी दाहालके अनुसार विरेन्द्र रावल ओ मिना लेखकके अस्पतालमे ओ अन्यके घटनास्थलमे मृत्यु हुइल हो ।
