जिसस कैलालीके प्रमुखके लाग दुई जानेक उम्मेदवारी
पहुरा समाचारदाता
धनगढी, २ अगहन । जिल्ला समन्वय समिति कैलालीके प्रमुखके लाग दुुई जानेक उम्मेदवारी परल बा ।
नेपाली काँग्रेससे टीकाकुमारी चौधरी(भुल) ओ नागरिक उन्मुक्ती पार्टीके ओरसे नागरिक उन्मुक्ती पार्टीके ओरसे रुक्मति डंगौराथारुके उम्मेदवारी परलक हो ।
टीकाकुमारी चौधरी(भुल)के प्रस्तावकमे कैलारी गाउँपालिकाके अध्यक्ष राजसमझ चौधरी ओ सर्मथकमे धनगढी उपमहानगरपालिकाके उप प्रमुख कन्दकला रानाथारु रहल बटी ।
ओस्टेक रुक्मति डंगौराथारुके प्रस्तावकमे जोशीपुर गाउँपालिका उपाध्यक्ष रेखाकुमारी कठरिया ओ समर्थकमे भजनी नगरपालिका उप प्रमुख राजु तिरुवा रहल बाटी ।
उम्मेदवारी दर्ता करलपाछे प्रदेश निर्वाचन कार्यालयके प्रमुख प्रेमराज भट्ट उहाँँहुँक्रन निस्सा प्रदान करल रहिट । टीकाकुमारी कैलारी गाउँपालिका वडा नम्बर २ के महिला वडा सदस्य हुइट ।
टीकाकुमारीहे वर्तमान सत्ता गठबन्धनसे काँग्रेस ओ एमालेके साझा उम्मेदवार हुइट ।
कैलाली जिल्ला समन्वय समितिके निर्वाचनके लाग सत्ता गठबन्धनसंग कूल २५ मध्ये १३ मत रहल बा । टीकाकुमारीके पक्षमे काँग्रेससंग ८ ओ एमालेसंग ५ मत बा । एमालेसे चुरे गाउँपालिकाके अध्यक्ष, गोदावरी नगरपालिकाके उपप्रमुख, वर्दगोरिया गाउँपालिकाके अध्यक्ष, लम्कीचुहाके उपप्रमुख ओ धनगढीके उपप्रमुखके मत सत्ता गठबन्धन उम्मेदवारके पक्षमे बा ।
ओस्टेक करके काँग्रेससे मोहन्यालके उपाध्यक्ष, लम्कीचुहाके नगर प्रमुख, चुरेके उपाध्यक्ष, घोडाघोडीके उपप्रमुख, गौरीगंगाके उपप्रमुख, गोदावरीके प्रमुख तथा कैलारी गाउँपालिकाके अध्यक्ष ओ उपाध्यक्षके मत बा । सत्ता गठबन्धनके उम्मेदवारहे निर्वाचित करैना नेपाली काँग्रेस कैलाली जिल्ला कार्यसमितिके सभापति नारायणदत्त भट्ट ओ एमालेके कैलाली अध्यक्ष यज्ञराज ढुगाना संयुक्त रुपमे अपिल करले बटै । उहाँक उम्मेदवारी दर्तामे कैलारी गाउँपालिकाके उपाध्यक्ष भगवतीकुमारी चौधरी, घोडाघोडी नगरपालिकाके नगर उपप्रमुख गुलियाकुमारी चौधरी, नेपाली काँग्रेस कैलालीके सभापति नारायणदत्त भट्ट, नेकपा एमालेक अध्यक्ष यज्ञराज ढुगानालगायतके सहभागिता रहे ।
नागरिक उन्मुक्ती पार्टीसे उम्मेदवार बनल रुक्मति डंगौराथारु टीकापुर नगरपालिका वडा नम्बर ४ के वडा सदस्य हुइट ।
समन्वय समितिके प्रमुखके उम्मेदवारी दर्ता कराई नागरिक उन्मुक्तिके प्रदेश सभा सदस्य कैलाश चौधरीसहित टीकापुर व भजनी नगरपालिकाक नगर प्रमुखक उपस्थितिमे उम्मेदवारी दर्ता कराइल रही । नागरिक उन्मुक्तिसंग सात मत रहल बा ।
कुल २६ मतभार रहल जिसस कैलालीमे नागरिक उन्मुक्तिके भजनी नगरपालिकामे प्रमुख ओ उपप्रमुख, जानकी ओ जोशीपुर गाउँपालिकामे अध्यक्ष ओ उपाध्यक्ष तथा टीकापुरमे नगर प्रमुख बाट । नागरिक उन्मुक्तिसे नेकपा माओवादी केन्द्र ओ समाजवादीके समर्थन पैलेसे २५ मध्ये ११ मत पैना सम्भावना बा । माओवादीसे टीकापुरके उपप्रमुख निर्वाचित हुइल खडकबहादुर शाह अब्बे निलम्बित बाट ।
कैलालीके समन्वय प्रमुख पदमे पदम कलेलके २०७९ पुस २३ मे निधन हुइलपाछे समन्वय प्रमुखके पद खाली बा । समन्वय प्रमुखके उप–निर्वाचन अगहन १६ गते हुइटी बा ।
