काँग्रेससे दलित ओ थारुनके प्रतिनिधित्व हुइना कैके जिसस प्रमुखमे टिकाकुमारी निर्वाचित
पहुरा समाचारदाता
धनगढी, ५ अगहन । कैलाली जिल्ला समन्वय समितिके प्रमुखमे नेपाली काँग्रेसके टिकाकुमारी चौधरी भुल निर्विरोध निर्वाचित हुइल बाटी ।
प्रमुखमे उम्मेदवारी दर्ता कराइल नागरिक उन्मुक्ति पार्टीके रुपमति डंगौरा थारु उम्मेदवारी फिर्ता लेहहलपाछे टिकाकुमारी निर्विरोध निर्वाचित हुइलक हुइट ।
अँटवारके रोज नेपाली काँग्रेससे कैलारी गाउँपालिकाक वडा–२ वडा सदस्य टिकाकुमारी ओ नागरिक उन्मुक्ति पार्टीसे टीकापुर नगरपालिकाके वडा–४ वडा सदस्य रुपमति उम्मेदवारी दर्ता कराइल रही ।
बुधके नागरिक उन्मुक्ति पार्टीके नेता लक्ष्मण किशोर चौधरी, टिकापुर नगर प्रमुख रामलाल डंगौरा थारु, नेपाली काँग्रेस कैलाली सभापति नारायणदत्त भट्ट लगायतके नेताहुँक्रनके उपस्थितिमे रुपमति प्रमुख पदमे डेहल उम्मेदवारी फिर्ता लेहल नेपाली काँग्रेसके जिल्ला सचिव केशव मिश्र जानकारी डेलै ।
उहाँ कहलै–‘रुपमतिके उम्मेदवारी फिर्तासंगे टिकाकुमारी जिसस प्रमुखमे निर्विरोध निर्वाचित हुइल हुइट ।’
काँग्रेससे दलित ओ थारुनके प्रतिनिधित्व हुइना कैके जिसस प्रमुखमे टिकाकुमारीहे आघे बढाइल उहाँक कहाई बा ।
