अध्यक्षमे प्रेमीलाल ओ महामन्त्रीमे मीनराज निर्वाचित
पहुरा समाचारदाता
धनगढी, ५ अगहन । थारु कल्याणकारिणी सभा (थाकस) के अध्यक्षमे प्रेमीलाल चौधरी सर्वसम्मत निर्वाचित हुइल बाटै । उहीसे आघे उहाँ महामन्त्री रहिट । रुपन्देहीके भैरहवामे जारी २३ औं महाधिवेशनसे उहाँहे अध्यक्षके जिम्मेवारी सुम्पल हो ।
ओस्टके महामन्त्रीमे मीनराज चौधरी सर्वसम्मत हुइल बाटै । उहीसे आघे उहाँ सहमहामन्त्री रहिट । बाँकी पद उपाध्यक्ष, सहमहामन्त्रीसहित सदस्यके टुङ्गो लग्ना बाँकी रहल नवनिर्वाचित अध्यक्ष चौधरी बटैले । सहमतिके प्रयास जारी रहल ओ १५ दिनभित्रे सक्कु पदके उम्मेदवारके लाग निर्णय होसेक्ना म्यान्डेट बन्दसत्रसे डेहल उहाँ जानकारी डेलै ।
अध्यक्षके अन्य आकांक्षी देवीप्रसाद चौधरीहे उपाध्यक्षमे सर्वसम्मत बनैना प्रयास हुइल बा । महिला उपाध्यक्षमे रुक्मिणी चौधरीके नाउँमे सहमतिके प्रयास जारी रहल बटाइल बा । थाकसमे ६ जाने उपाध्यक्ष रहना व्यवस्था रहल बा ।
डुुई जाने महिला उपाध्यक्षमे सावित्रा चौधरी तथा हरिदेवी चौधरीके नाउँ मोटामोटी सहमति लग्गे रहल जनाइल बा । ६ जाने उपाध्यक्षके लाग १३ जनहनके उम्मेदवारी परल बा ।
ओस्टके, चूर्णबहादुर चौधरी पुनः कोषाध्यक्षमे दोहरना सम्भावना रहल बटाइल बा । राजेन्द्र चौधरी (चितवन)फेन कोषाध्यक्षमे दावी करले बाटै । बुधसम बन्दसत्रमे सहमतिके प्रयास हुइना ओ कुछ पदमे सहमति हुइना विश्वास नवनिर्वाचित अध्यक्ष चौधरी बटैलै ।
थाकसके महाधिवेशनके उदघाटन उपप्रधानमन्त्री तथा अर्थमन्त्री विष्णुप्रसाद पौडेल अगहन १ गते करल रहिट । महाधिवेशनमे करिब ३ सय प्रतिनिधि सहभागी रहल थाकस पदाधिकारीहुक्रनके कहाइ रहल बा । थाकसमे अब्बे मनोनितसहित ६१ सदस्यीय कार्य समिति रहना वैधानिक व्यवस्था रहल बा ।
