कैलारीके भल्मन्सनहे सिकलसेल ओ थलेसिमिया रोग सम्बन्धी अभिमुखीकरण

रोग न्यूनिकरणके लाग चेकजाँच आवश्यकः गाउँपालिका उपाध्यक्ष

पहुरा समाचारदाता
हसुलिया, ६ अगहन । कैलाली जिल्लास्थित कैलारी गाउँपालिकाके भल्मन्साहुकनहे सिकलसेल ओ थलेसिमिया रोग सम्बन्धी एक दिने अभिमुखीकरण तालिम डेगिल बा ।

कैलारी गाउँपालिका स्वास्थ्य शाखाके आयोजनामे भल्मन्साहुकनहे अभिमुखीकरण तालिम डेगैलक हो । गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ कैलाली जिल्लाके कैलारी गाउँपालिकामे सबसे ढेर सिकलसेलके विमारी रहल बटैली ।

उहाँ कहली,‘कैलारी गाउँपालिका ९८ प्रतिशत थारु समुदायके बसोबास रहल पालिका हो । यी रोग थारु समुदायमे ढेर डेखा परल ओरसे यी रोग न्यूनिकरणके लाग वडा–वडामे सिकलसेल जाँच शिविर संचालन करल बा ।’

कैलारीमे सिकलसेल अस्पताल बनैना कहिके कार्यपालिकासे निर्णय करल बा,’ गाउँपालिका उपाध्यक्ष कहली, ‘सिकलसेल अस्पताल वडा नम्बर ३ के पुरान दिपेन्द्र प्राविमे बनैना कहिके कार्यपालिकाके निर्णय हुइल बा । उ ठाउँ छोट हुइल कना बाट आइलपाछे बसौटीके विद्यालयहेफे हेरगिल रहे । मने उ फे दुर हुइल कना बाट आइलपाछे हुलाकी सडकसे जोरल ठाउँमे रोज्ना सल्लाह आइल बा ।’

उहाँ कहली, ‘कैलारी गाउँपालिकासे वडा नम्बर ८ मे रहल उदासीपुर प्राथमिक स्वास्थ्य केन्द्रमे नियमित सिकलसेल जाँचफे करटी आइल ओरसे सिकलसेलके लक्षण विल्गाइल व्यक्तिहुकनहे सम्पर्क कराडेना उहाँ आग्रह करली ।

प्रत्येक वडासे १०÷१० जाने करके ९० जाने भल्मन्साहुकनहे सिकलसेल तथा थलेसिमिया सम्बन्धी अभिमुखीकरण तालिम डेजैटी रहल कैलारी गाउँपालिका स्वास्थ्य शाखाके सिअनमी अनिता चौधरी जानकारी डेली । कैलारी गाउँपालिकाके १ सय ४ जाने सिकलसेल रोगके विमारी नियमित औषधी खैटी रहल स्वास्थ्य शाखाके प्रमुख नरेशकुमार चौधरी जनैलै । उहाँ कहलै, ‘औषधी उपचारके लाग धनगढी जैना विमारीहुकनहे यातायात खर्चफे उपलब्ध करैटी रहल जनैलै ।

तालिममे सहजीकरण तथा प्रशिक्षण कैलारी गाउँपालिकासे वडा नम्बर ८ मे रहल उदासीपुर प्राथमिक स्वास्थ्य केन्द्रके डाक्टर खगेन्द्र चौधरी डेटी डेले बटै