दुई राजनीति दलभिटर कौनो समस्या नैहोः गृहमन्त्री लेखक

पहुरा समाचारदाता
धनगढी, ६ अगहन । गृहमन्त्री रमेश लेखक दुई राजनीतिक दलभिटर कौनो समस्या नैरहल बटैले बटै ।
विफेक रोज धनगढीमे नेपाल प्रेस यूनियन कैलालीसे आयोजिक पत्रकार सम्मेलनमे बोल्टी उहाँ उ बाट बत्वाइल रहिट । कांग्रेस–एमालेके सहमतिमे प्रधानमन्त्री केपी शर्मा ओलीके चीन भ्रमणके एजेन्डा तय हुइल बा, उहाँ चीन जैही, उहाँसे आइलपाछे मित्रराष्ट्र भारतके भ्रमणफे तय हुई उहाँफे जैही । ओम्नेफे कौनो समस्या नैहो, गृहमन्त्री कहलै ।
प्रधानमन्त्री चीन, भारतके भ्रमण जाके जा विषयमे छलफल हुई यहाँफे दुई पार्टी छलफल हुई ओम्ने हम्रे सहमत हुइबी, गृहमन्त्री लेखक कहलै, ‘चीन भ्रमणसे नेपाली काँग्रेस ओ एमालेविच कौनो समस्या नैहुई यम्ने कौनो शंका नै कैना आग्रह बा ।’
उहाँ कहलै, ‘सरकार परिवर्तन ओ मन्त्री मण्डल परिवर्तनके बाट बा, यी प्रधानमन्त्रीय पद्धति हो । प्रधानमन्त्री पद्धतिमे आवश्यकता अनुसार हेरफेर हुइठ । दुई भारी दललगायत और पार्टी मिल्के सरकार बनल बा । मन्त्री मण्डल फेरबदल हुईलेसे प्रधानमन्त्री दलहुकनसंग छलफल करही यी निरन्तर ओ स्वाभाविक प्रक्रिया हो । मने आजके दिनसम मन्त्री हेरफेर हुइना बाट हल्ला बाहेक कुछफे नैरहल हो ।’
डसियामे सरकार परिवर्तन हुई कना हल्ला रहे । डसिया कटल, डेवारीमे परिवर्तन हुई कना हल्ला रहे मने डेवारीफे कटल, खै टे सरकार परिवर्तन, आब फेरसे अगहन (मंसिर) कहटै । डसिया, डेवारी, मंसिर कहल, २०८४ सालके स्थानीय तहके निर्वाचन पाछे हो, उहाँ कहलै ।
उहीसे आघे एक बर्ष आठ महिना अब्बेक प्रधानमन्त्री केपी शर्मा नेतृत्व करही,ओकरपाछे प्रधानमन्त्री नेतृत्व परिवर्तन हुके नेपाली काँग्रेसके सभापति शेरबहादुर देउवा प्रधानमन्त्री बन्ही, ओ २०८४ सालके चुनाव हुई । ०८४ सम शेरबहादुर देउवा प्रधानमन्त्री रहिही, फेरना कहल उहे बेला हो । जौन पार्टी बहुत ल्यानी उहे नेतृत्व लि यी स्वाभाविक हो, उहाँ कहलै ।
विआरआईके अनुदान लेनाबारे भारी दलविच बाट नैमिलल कना संचारकर्मीनसे पुछल प्रश्नके जवाफ डेटी दुई दलविच छलफल हुइटी रहल बटैलै । ऋण लेना नैलेना दुई दलविचके सहमति सहकार्यमे हुई मने यिहीसे दुई दलमे कौनो समस्या नैहुई उहाँ कहलै ।
कञ्चनपुरके निर्मला पन्तके हत्याबारे बोल्टी उहाँ अनुसन्धान जारी रना बटैलै ।
ओस्टेक सहकारी ठगबारे संचारकर्मीनसे पुछल प्रश्नके जवाफमे उहाँ सहकारीमे लाखौ लाख रुप्या बचतकर्ताके रकम जमा हुइल रहठ, सहकारी ठगीबारे पाँच दलके सहभागितामे छानविन समिति बनाइल बा । ओइनके करल छानविनके प्रतिवेदन पेश करल बा । ओम्ने सहकारीसे गलत ठंगसे रकम गैल प्रतिवेदनमे उल्लेख हुइल बा । छानविन समितिसे जा उल्लेख करले बा, उ कार्यान्वयन हुइटी रहल बा । सहकारीमे रकम अवचलन कैना, सहकारीके रकम ठगी कैना, हिनामिना कैना मनै उप्पर कार्वाही हु्इटी रहल गृहमन्त्री बटैलै ।
उहाँ कहलै, ‘मनैनहे मुह हेरके, पार्टी हेरके कर्वाही कैना अनुसन्धान कैना बाट नैहुई, प्रमाण हेरके हु्ई । प्रमाण हेरके, तथ्य हेरके हुइना हो, ओम्ने जेफे सहभागी रही, ओकर उप्पर अनुसन्धान हुई, कानून बमोजिम आघे बह्री । अनुहार हेरके, पार्टी हेरके, कुहीहे रिस उठके, कुहीहे मन पराके कार्वाही कैना नैकैना बाट नैहुई । जेकर विरुद्ध तथ्य प्रमाण भेटजाई उहीहे कार्वाही हुई । यिहीहे राजनीतिक होहल्ला बनैना विषय नैहुई उहाँ कहलै ।
गेटा अस्पतालके विषयमे बोल्टी यी हाली संचालनमे अइना जरुरी रहल बटैलै । गेटा अस्पताल चलैना विषयमे विद्येयक सदनमे पेश हुइल बा, उहीहे हाली पास करके संचालन ल्यन्ना अपन प्रयास जारी रहल उहाँ बटैलै ।
