विविध कार्यक्रम सहति लैंगिक हिंसा विरुद्धके १६ दिने अभियान मनाजैटी
पहुरा समाचारदाता
धनगढी, ९ अगहन । ३३ औं अन्तर्राष्ट्रिय लैंगिक हिंसा विरुद्धके १६ दिने अभियान कैलाली ओ कञ्चनपुरके स्थानीय तहमे विविध कार्यक्रम सहित मनैना हुइल बा ।
‘हमार सबके प्रतिवद्धता लंैगिक हिंसा अन्त्यके लाग ऐक्यवद्धता’ कना मूल नारा सहित मनैना हुइल हो । अट्वारके रोज पत्रकार सम्मेलन मार्फत अभियान बारे जानकारी करागिल रहे । लिङ्गके आधारमे हुइना सक्कुखाले हिंसा अन्त्यके लाग स्थानीय तहमे सचेतनामूलक कार्यक्रम कैना जनाइल बा ।
हरेक बरस नोभेम्बर २५ से डिसेम्बर १० सम लैङ्गिक हिंसाविरुद्धके १६ दिने अभियान सञ्चालन करजाइठ् । मने इ बरस गैरसरकारी संस्था महासंघ सुदूरपश्चिम प्रदेशके नेतृत्वमे २२ ठो गैरसरकारी संघसंस्थासे संयुक्त रुपमे लैङ्गिक हिंसाविरुद्धके १६ दिने अभियान सञ्चालन करे लागल जनाइल बा ।
लैङ्गिक हिंसाविरुद्ध सचेतनाके लाग पालिकामे अन्तरक्रिया, ¥याली, अभिमुखीकरण, घुम्ती शिविर, सडक नाटक लगायतके सचेतनामूलक कार्यक्रम कैना जनाइल बा । अभियानभर १५३ ठो सचेतनामूलक कार्यक्रम कैना ओ ओकर लाग अनुमानित २८ लाख १७ हजार बजेट खर्च हुइना पत्रकार सम्मेलनमे जानकारी डेहल बा ।
अभियान अवधिभर कैलालीके १३ ओ कञ्चनपुरके एक सहित १४ ठो पालिकामे लैङ्गिक हिंसा अन्त्य सम्बन्धी विविध कार्यक्रम कैना महासङ्घके अध्यक्ष देवीप्रसाद खनाल जानकारी डेलै । उहाँ लैङ्गिक हिंसा, बाल विवाह, आत्महत्या, लागु हिंसा लगायत टमान हिंसाविरुद्ध जनचेतनामूलक कार्यक्रम कैना उल्लेख करलै ।
सन् १९६० नोभेम्बर २५ मे डोमिनिकन गणतन्त्रके तत्कालीन राफेल ट्रिजुलो तानासाही सरकारसे मिरावेल परिवारके तीन साहसी दिदीबहिनीया पेट्रिया, मिनर्भा ओ मारियाके हत्या करलपाछे ल्याटिन अमेरिकी देशमे हिंसाविरुद्धके दिवसके रूपमे मनाइ लागल रहे । पाछे सन १९९९ मे संयुक्त राष्ट्र सङ्घसे इहीहे आत्मसात् कैके नोभेम्बर २५ के दिनहे संसारभर नै महिला हिंसाविरुद्धके अन्तर्राष्ट्रिय दिवसके रूपमे स्थापित करले बा । महिला हिंसाविरुद्धके अन्तर्राष्ट्रिय दिवस दिनसे लैङ्गिक हिंसाविरुद्धके १६ दिने अभियान सुरु कैना करल जनाइल बा ।
पत्रकार सम्मेलनमे गैससके केन्द्रीय सदस्य सावित्रा घिमिरे, टंक ढुंगाना, फाया नेपालके अध्यक्ष गोमा आचार्य, ओरेकके जिल्ला संयोजक गीता चौधरी, सिएसएसडीके अध्यक्ष मिना ओझा लगायत टमान संघसंस्थाके प्रतिनिधीके रहल रहिट ।
