अवैध लागु औषधसहित ४ जाने पक्राउ

पहुरा समाचारदाता
धनगढी, १३ अगहन । कैलालीके अलग अलग ठाउँसे १ ग्राम ५७० मिलिग्राम लागु औषध खैरो हेरोईनसहित ४ जाने पक्राउ परल बटै ।

ईलाका प्रहरी कार्यालय टिकापुरसे खटके गैल प्रहरी टोलीसे कैलालीके जानकी गाउँपालिका वडा नं. ०७ बैठना बर्ष १९ के शंकर चौधरी, टिकापुर नगरपालिका वडा नं. ०३ रामपुर स्थित सडक छेउमे लागु औषध खैरो हेरोईन खैटी रहल अवस्थामे फेला परल जिल्ला प्रहरी कार्यालय कैलालीके प्रवक्ता कविन्द्र सिंह बोहरा जनैलै ।

हुकान शरीर खानतलासी करेबेर १ ग्राम ७० मिलिग्राम लागु औषध खैरो हेरोईन फेला पारके हुकहिनहे नियन्त्रणमे लेके आवश्यक कारवाही लाग ईलाका प्रहरी कार्यालय टिकापुरमे धारल बा ।

ओस्टेक करके ईलाका प्रहरी कार्यालय मालाखेती ओ लागु औषध नियन्त्रण ब्युरो शाखा कार्यालय धनगढीसे खटल संयुक्त प्रहरी टोली जिल्ला कैलाली गोदावरी नगरपालिका वडा नं. ०९ स्थित शंकास्पद रुपमे नेग्टी रहल अवस्थामे वडा नम्बर ८ बैठना बर्ष अन्दाजी २० के बिबेक चौधरीहे चेकजाँच करेबेर हुकानथेनसे ३६० मिलिग्राम लागु औषध (खैरो हेरोईन) फेला पारके थप अनुसन्धानके लाग ईलाका प्रहरी कार्यालय मालाखेतीमे धारल उहाँ जनैलै ।

ओस्टेक करके ईलाका प्रहरी कार्यालय भजनीसे खटके गैल प्रहरी टोलीसे जिल्ला कैलाली भजनी नगरपालिका वडा नं. ०३ मोरीयाघाट स्थित भारतसे नेपालओर पैदल अइटी रहल कैलाली टिकापुर नगरपालिका वडा नं. ०३ शंकरपुर बैठना बर्ष २१ के किसन बि.क. बर्ष २९ के लक्ष्मी प्रसाद चौलागाईहे १४० मिलिग्राम खैरो हेरोईनसहिट पक्राउ करके ईलाका प्रहरी कार्यालय भजनीमे धारके थप अनुसन्धान कार्य हुइटी रहल प्रवक्ता बोहरा जनैलै ।