बोक्सी प्रथा बिरुद्ध जनचेतना जोगैटी बाल अधिकार चेतना समूह
पहुरा समाचारदाता
कञ्चनपुर, १३ अगहन । बालअधिकार चेतना समुहके बालबालिकाहुक्रे समाजमे व्याप्त टमान कुरीती ओ कुसस्कार विरुद्ध जनचेतना जगैना अग्रसर हुइल बटै ।
अनौपचारिक क्षेत्र सेवा केन्द्र (इन्सेक) से लालझाँडी गाउँपालिकाके बिद्यालयमे गठित बालअधिकार चेतना समुहके बालबालिकाहुक्रे समाजमे व्याप्त टमान कुरीती ओ कुसस्कार विरुद्ध जनचेतना जगाइक लाग अग्रसर डेखल हुइट ।
लालझाँडी गाउँपालिकाके वडा नम्बर –१ नौरंगास्थित शारदा राष्ट्रिय माध्यमिक विद्यालयमे गठित बाल अधिकार चेतना समूहसे लागुऔषध दुव्र्यशनी, बालबिबाह, बोक्सी प्रथा, छाउपडी प्रथा, दाईजो प्रथा लगायतसे समाजमे परटी रहल असर ओ व्याप्त कुरीति, कुसस्कार निवारणके लाग सरोकावालाके भुमिका झल्कन खालके जनचेतना जगैना सडक नाटक टोलीसे निर्माण करके गाउँपालिकाके टमान ठाउँमे सडक नाटक प्रदर्शन करटी रहल बटै ।
यिहे सिलसिलामे लालझाँडी गाउँपालिकाके महिला तथा बालबालिका शाखासे संचालन करटी करल लैङ्गिक हिंसा विरुद्धके १६ दिने अभियानके अवसर पारके लालझाँडी गाउँपालिका १ नं. वडा कार्यालयमे २०८१ अगहन १३ गते इन्सेक, निड्स नेपाल, पिसवान लागाएतके संघ संस्थाके साभोदारीमे आयोजना करल शुभकामना आदान प्रदान कार्यक्रममे बालअधिकार चेतना समुहसे बोक्सी प्रथासे समाजमे परटी रहल असर ओ न्यूनिकरणमे सरोकारवालाहुकनके भुमिका विषयमे सडक नाटक तयार पारके प्रदर्शन करले बा ।
मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल हो । सडक नाटक प्रदर्शनमे शिक्षक, विद्यार्थी, अभिभावक, भलमान्सा, निर्वाचितजन प्रतिनिधि, मानबअधिकार समुहके सदस्य लगायत सयौंके संख्यामे स्थानीयहुकनके उपस्थिति रहल रहे । सडक नाटक प्रदर्शन कार्यक्रममे बालबालिकाहुक्रे समाजमे व्याप्त बोक्सी प्रथासे हुइटी रहल लैङ्गिक हिंसा, समाजमे परटी रहल नकरात्मक असर ओ रोकथामके लाग सरोकारवालाहुकनके भुमिका झल्कैना प्रयास करल रहिट ।
लालझाँडी गाउँपालिका वार्ड नं. १ के कार्यबाहक अध्यक्ष पशुपति बि.क. बालबालिकाहुक्रे प्रदर्शन करल सडक नाटक हमार समाजके यथार्थ चित्रण करल बटैटी नाटकसे डेहे खोजल सन्देशहे मनन करके आ अपन घर तथा समाजमे व्याप्त बोक्सी प्रथाके कारण हुइना लैङ्गिक हिंसा न्यूनीकरणके लाग अपनसे सुरुवात कैना सहभागीहुकनहे आग्रह करलै । लालझाँडी गाउँपालिका स्तरीय भल्मन्सा समन्वय समितिके अध्यक्ष अतिराम चौधरी यी नाटक मार्फत बालबालिकाहुक्रे डेहे खोजल सन्देश वास्तममे मननयोग्य रहल बटैटी यैसिन खाले नाटकहे गाउँपालिकाके टोल–टोलमे प्रदर्शन कैना आवश्यक रहल बटैलै । उहाँ यैसिन खाले नाटकमार्फत समाजमे सकरात्मक सन्देस प्रवाह करलमे बालअधिकार चेतना समुहहे धन्यवाद ज्ञापन करलै ।
१४ जाने पात्र रहल सडक नाटकमे सासु बोक्सीके आरोप खेप्टी रहल पटुहिया, छाई, भल्मन्सा, प्रहरी, विद्यालयके शिक्षक, वडाअध्यक्ष, बालअधिकार चेतना समुहके पदाधिकारी लगायतके बोक्सी प्रथा यूनिकरणमे हुई सेक्ना भुमिका झल्कना खालके कथा प्रस्तुत करल रहे ।
