बसन्तामे लवाङगी पुजा व बरका भजहर मनागिल
पहुरा समाचारदाता
धनगढी, १३ अगहन । कैलाली जिल्लाके कैलारी गाउँपालिका वडा नम्बर ७ छटकपुर बसन्ता गाउँमे लवाङगी पुजा ओ बरका भजहर कार्यक्रम एक्के ठाउँमे संगसगे मनागिल बा ।
लौवा अन्नवाली धान भित्रया सेकलपाछे थारू समुदायमे उहीहे पुजा कैके खैना चलन अनुसार लवाङगी पुजा करलक ओ गाउँघरसे रोगडोख, आपतविपट दुर होए कहिके भजहर मनैलक डेसबन्धिया गुरुवा दुर्गाप्रसाद चौधरी जनैलै ।
गाउँक समाजसेवी तथा पूर्व भल्मन्सा जियाराम चौधरी आपन गाउँमे थारु समुदायके परम्परा अनुसार लवाङगी पुजा करल ओ संस्कृति झल्कैना कार्यक्रमसहितक भजहर मनैलक बटैलै ।
लवाडगी पुजा ओ भजहर कार्यक्रम छटकपुर गाउँमे रहल १ सय ९२ घरके एक दिनके कलुवा अक्के ठाउँमे पकाके खाइल ओ पौराणिक खेल खेलके रहरङगी कैलक उहाँ जनैलै । भजहरमे सहभागी रहल थारुजनेवाहुँक्रे कोइली डिडी, छुरबगदुर, सिक्टीफोर खेल खेलल ओ थारु समुदायके संस्कृति झल्कना नाँचफे करल रहिट ।
ओस्टेक करके लवाङगी पुजापाछे लौव गुरुवाफे छनौट कैके बालीफे उठैटी रहल गाउँक पूर्व भल्मन्सा जियाराम चौधरी जानकारी डेलै ।
छटकपुर बसन्ता गाउँबासीहुँक्रे सर्वसहमतिसे आठ गाउँ खेलैटी रहल पुराने डेशबन्धिया गुरुवा भजनी निवासी दुर्गाप्रसाद चौधरीहे एक बरसके लाग फेरसे गुरुवा चुनलक उहाँ जनैलै ।
छटकपुर बसन्तामे बालीके रुपमे बरस भरिक लाग गुरुवाहे १२ कुन्टल धान, चौकीदार (चिराकी)हे १३ कुन्टल धान ओ भल्मन्साहे १८ हजार रुप्या डेटी आइल उहाँ जनैलै । उहाँहुकनहे वाली डेहक लाग घरौर १ मन धान उठैना चलन रहलफे जनैलै ।
ओस्टेक करके कैलालीके घोरीघोरामे यिहे अगहन १९ गतेसे २१ गतेसम घोरीघोरा लवाङगी पुजा ओ थारु सांस्कृतिक महोत्सवके आयोजना कैगिल बा ।
घोरीघोरा नगरभल्मन्सा कार्य समिति, सन्त समागम समाज, घोरीघोरा तथा संस्कृति सरक्षण समाजके आयोजनामे हुइना लवाङी पूजा तथा थारु सांस्कृतिक महोत्सव तयारी तिव्र गतिमे हुइटी रहल संयोजक बुधराम चौधरी जनैलै ।
लवाङगी पुजा संगे थारु पौराणिक नाँच हुरडुङवा नाँच, मुङग्रहवा नाँच, सखिया नाँच, झुमरा, कठघोरी, होरी, लठहुवा, गुरुवा नाँच, ढाक बजैना, मागर, धमार गीतसंगे भजनकिर्तनफे हुइना संयोजक जनैलै । ओस्टेक करके थारु समुदायके गायक, मोडेल, डान्सरहुकनके वेजोर प्रस्तुती रनाफे उहाँ जनैलै ।
