धनगढीके विकासमे पत्रकारके भूमिका महत्वपूर्ण
पहुरा समाचारदाता
धनगढी, १५ अगहन । धनगढी उपमहानगरपालिकाके विकासमे पत्रकारके भूमिका महत्त्वपूर्ण रहल एक कार्यक्रमके सहभागी बटैले बाटै ।
नेपाल पत्रकार महासङ्घ सुदूरपश्चिम प्रदेश समितिसे शनिच्चरके धनगढीमे आयोजना करल अन्तरक्रिया कार्यक्रमके सहभागी ओइसीन बटाइल हुइट । उहाँहुक्रे धनगढी उपमहानगरपालिकाके मजा पक्षहे उजागर गकैना ओ नैमजा पक्ष सच्याइक लाग मिडियासे खबरदारी कैना कार्य करटी रहल बटैले बाटै ।
कार्यक्रममे नेपाल पत्रकार महासंघके केन्द्रीय सचिव हेमकर्ण विकले भौतिक पूर्वाधार निर्माणमे किल नैहोके शिक्षा, स्वास्थ्य लगायत मानवीय पक्षसंग जोरल विकासमे ध्यान डेना धनगढी उपमहानगरपालिकाहे आग्रह करल रहिट ।
ओस्टके, धनगढी उपमहानगरपालिका–३ के वडा अध्यक्ष राजबहादुर ऐर भौतिक ओ मानवीय विकासके लाग धनगढी उप–महानगरपालिका प्रतिबद्ध रहल बटैलै । धनगढीमे विकास गति लेहल उल्लेख कैटी उहाँ कहलै,“कौनो फेन विकासके काम ओ योजना पहुँचके भरमे डेहल नैहो ।”
ओस्टके, धनगढी उप–महानगरपालिका–६ के वडा अध्यक्ष भागीराम चौधरी धनगढी उप–महानगरपालिकाके वडा प्राथमिकता ओ आवश्यकताके आधारमे काम करटी रहल बटैलै । धनगढीके विकासके लाग अपनेहुक्रे एकदमै लागल उहाँके कहाइ रहे ।
कार्यक्रममे नेपाल पत्रकार महासङ्घ कैलालीके अध्यक्ष हिमाल जोशीले धनगढीभिट्टर सरसफाइमे उल्लेखनीय सुधार हुइल बटैलै । उहाँ मजा कामके प्रोत्साहन कैना ओ नैमजा काम रहलमे खबरदारी कैना पत्रकारके धर्म रहल उल्लेख करलै ।
नेपाल पत्रकार महासङ्घ सुदूरपश्चिम प्रदेशके अध्यक्ष योगेश रावलके अध्यक्षतामे हुइल अन्तरक्रिया कार्यक्रममे वडा अध्यक्ष भुवन रिजाल, कार्यपालिका सदस्य निशा आउजी लगायत बोलल् रहिट । धनगढी उपमहानगरपालिकाके सहकार्यमे कार्यक्रम हुइल रहे ।
