१२ मुक्तकमैया परिवार पैलै सुरक्षित आवास
पहुरा समाचारदाता
धनगढी, १६ अगहन । कैलाली जिल्लाके बर्दगोरिया गाउँपालिका वडा नम्बर ४ स्थित दनुवाफाँटामे १२ मुक्तकमैया परिवारहुकनहे सुरक्षित आवास हस्तान्तरण कैगिल बा ।
सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्रालय, हेविट्याट फर हयुमानिटी नेपालके सहकार्यमे राष्ट्रिय दलित नेटवर्कके सामाजिक परिचालन प्राविधिक सहयोग ओ बर्दगोरिया गाउँपालिकाके समन्वयमे उ बस्तीके सुरक्षित घर निर्माण करके शुकके रोज हस्तान्तरण कैगिल हो ।
सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्रालयके माननीय मन्त्री विरबहादुर थापा, हेविट्याट फर हयुमानिटी नेपालके कार्यकारी निर्देशक लक्षिन्द्र महार्जन, आरडिएनके अध्यक्ष मोहन वड, प्रदेश नीति आयोगके उपाध्यक्ष गणेश विक लगायतसे उ बस्तीके भल्मन्सा मसुरा डगौराहे नवनिर्मित घरके चाभी हस्तान्तरण करल रहिट ।
प्रतिघर निर्माणके लाग सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्रालयसे साढे तीन लाख ओ हेविट्याट फर हयुमानिटी नेपालसे दुई लाख ओ राष्ट्रिय दलित नेटवर्कके सामाजिक परिचालन प्राविधिक सहयोग घर निर्माण हुइल हेविट्याट फर हयुमानिटी नेपालके सुदूरपश्चिम प्रदेश प्रमुख पुनिता चौधरी जनैली ।
मुक्तकमैया परिवारके लाग निर्माण हुइल सुरक्षित घर हस्तान्तरण कार्यक्रममे सम्बोधन करटी भुमि व्यवस्था तथा कृषि सहकारी मन्त्री विरबहादुर थापा यी बरसफे मुक्तकमैया, हलिया परिवारके लाग बजेट विनियोजन करल बटैलै । उहाँ कहलै, ‘मुक्त घोषणा हुके पुनस्र्थापना हुइना बाँकी सक्कुहुनके समस्या समाधानके लाग आघे बह्रे पर्ना जरुरी बा । यकर लाग स्थानीय तहसे समन्वय करके आघे बह्रव । परिचयपत्र पाकेफे सेवासे बञ्चित हुइल हुकानके हकमे समस्या समाधान कैना जरुरी बा । यी काम तत्काल सुरु कैना बा ।’
दनुवाफाँटामे रहल ३२ घर मन्से १२ परिवार केल्ह सुरक्षित घर पाइल ओरसे यी बस्तीके सक्कु परिवारके लाग घर बनैना जरुरी बा । स्थानीय तह यकर अगुवाई कलेसे प्रदेश सरकारसेफे साथ डेना मन्त्री थापा प्रतिवद्धता जनैलै ।
मन्त्रालयके फोकल पर्सन धर्मराज ओझा मन्त्रालय ओ हेविट्याट फर हयुमानिटी नेपालके आर्थिक सहयोग, राष्ट्रिय दलित नेटवर्कके सामाजिक परिचालन प्राविधिक सहयोगमे वेदकोटमे २५ घर, राजी बस्तीके २५ घर, कैलारीमे २७ घर, दिपायलमे बादी समुदायके लाग ७ घर ओ लम्की चुहाके कौवापुरमे १० परिवारके सुरक्षित आवास निर्माण करल जनैलै ।
प्रदेश तथा नीति आयोगके उपाध्यक्ष गणेश विक २०५७ सालमे कमैया मुक्ती घोषणा हुइल मने अभिन मुक्तकमैया पुनस्र्थापनासे बञ्चित रना दुःखद बाट रहल बटैलै । उहाँ कहलै, ‘मुक्तकमैया, हलिया, कम्लहरीके समस्या समाधान हुइना बाँकी बा । यकर लाग सक्कु तहसे लाग पर्ना जरुरी बा ।’
बर्दगोरिया गाउँपालिकाके अध्यक्ष कर्णबहादुर कुवँर मुक्तकमैयाहुकनके लाग सुरक्षित आवास बनैनामे सहयोग कैलक ओरसे सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्रालय, हेविट्याट फर हयुमानिटी नेपालके सहकार्यमे राष्ट्रिय दलित नेटवर्कहे धन्यवाद डेलै । उहाँ कहलै, ‘हम्रे मुक्तकमैयाहुकनके जग्गा डेना, ओइनके समस्या समाधानके लाग लागल बटी । यकर लाग सक्कु ओरसे सहयोग पैलेसे पालिका मुक्तकमैयाके समस्या समाधान कैना तयार बा ।’
हेविट्याट फर हयुमानिटी नेपालके कार्यकारी निर्देशक लक्षिन्द्र महार्जन अपनेहुक्रे मन्त्रालयके सहकार्यमे मुक्तकमैयाहुकनके लाग सुरक्षित आवास बनाई पाइलमे खुशी व्यक्त करलै ।
बस्तीके लाभग्राही सुजन डगौरा मुक्तकमैयाहुकनके लाग सुरक्षित आवास बनाके भारी गुन लगाइल ओरसे सक्कु जाने खुशी रहल बटैलै । उहाँ बस्तीमे रहल बाँकी मुक्तकमैयाहुकनके लागफे घर बनाडेना आग्रह करलै ।
आरडिएनके अध्यक्ष मोहन वड घर नैरहल मुक्तकमैया, हलियाहुकनहे घर डेना, ओ जग्गा नैरहल हुकनके जग्गा डेके पुनस्र्थापना कैना जरुरी रहल बटैलै । उहाँ मन्त्रालयसे मुक्तकमैया परिवार लाग सुरक्षित आवास बनैनामे सहयोग करलेक धन्यावादफे डेलै ।
सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्रालयके सचिव यज्ञराज जोशीके अध्यक्षतामे हुइल कार्यक्रममे हेविट्याट फर हयुमानिटी नेपालके सुदूरपश्चिम प्रदेश प्रमुख पुनिता चौधरी स्वागत मन्तव्य व्यक्त करल रही । कार्यक्रमके संचालन सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्रालयके फोकल पर्सन धर्मराज ओझ करल रहिट ।
