हरियाली सामुदायिक वनके २१ औं वार्षिक साधारणसभा

जीवन चौधरी
जोशीपुर, १७ अगहन । कैलालीके जोशीपुर गाउँपालिका वडा नम्बर ३ भित्तरियामे रहल हरियाली सामुदायिक वन उपभोक्ता समुहके २१ औं वार्षिक साधारणसभा तथा सार्वजनिक सुनुवाई कार्यक्रम सम्पन्न हुइल बा ।

उ सामुदायिक वनके अध्यक्ष राहुल बुढाके अध्यक्षतामे हुइल कार्यक्रममे राष्ट्रिय सभा सदस्य नारायणदत्त मिश्र बरका पहुना रहिट । उहाँ वन संरक्षणके लाग बनुवा भिटर रहल डगरहे व्यवस्थित बनाई पर्ना बटैलै ।
विशिष्ट पहुना सामुदायिक वन समन्वय समिति भजनीके अध्यक्ष खोजराज चौधरी वन संरक्षण ओ प्रवद्र्धनमे जोर डेहल रहिट ।

जोशीपुर गाउँपालिकाके अध्यक्ष चित्रबहादुर चौधरी लडिया, खोलानालके व्यवस्थापनसंगे डगरघाट कालोपत्रे कैना गाउँपालिकाथेन बजेटके अभाव रहल बटैलै ।

जोशीपुर–३ के वडा अध्यक्ष  रेणु  कुमारी डंगौरा भित्तरिया मन्दिरके लाग पाँच लाख बजेट विनियोजन करल बटैलै ।

समाजसेवी पञ्चराम चौधरी वातावरण ओ जलवायू संरक्षणके नाउँमे भाषा कैना मागी खैना भाँरा केल बनाइल आरोप लगैलै ।
तराई भु परिधि तालके फिल्ड सुपर भाइजर तिलक चौधरी बातावरण सन्तुलन कैना वन संरक्षणमे जोर डेहे पर्ना बटैलै । सव डिभिजन वन कार्यालय भजनीके वनरक्षक प्रकाश विक वन संरक्षणके अभियानहे प्राविधिक, भौतिक ओ कानूनी रुपसे सहयोग कैना प्रतिवद्धता जनैलै ।

जोशीपुर जेसिजके पूर्व अध्यक्ष सन्तोष पौडेल जोशीपुरमे बाढ प्रकोपके सामना करे परटी रहल ओरसे तीन तहके सरकारसे समन्वय करके समस्या समाधान कैना ओर लाग पर्ना आग्रह करलै ।

कार्यक्रममे पहुनाहुकनहे कदरपत्र, मायाके चिनो, ओ जेहेन्दार विद्यार्थीहुकनहके स्कुल झोला वितरण कैगिल बा ।
सामुदायिक वनके साधारणसभामे थारु महालोक गायक मनिराम करियामघरिया वन संरक्षण सम्बन्धी सचेतनामुलक गीत गाके मनोरञ्जन प्रदान करल रहिट । ओस्टेक प्रियङका चौधरी आपन नृत्य प्रस्तुत करल रही ।
कार्यक्रमके स्वागत मन्तव्य कोषाध्यक्ष सुनिता सुनार ओ संचालन पत्रकार धर्मेन्द्र विष्ट करल रहिट ।