राधा कृष्ण सामुदायिक वनके १८औं बार्षिक साधारण सभा
जीवन चौधरी
भजनी, १८ अगहन । कैलालीके भजनी नगरपालिका वडा नम्बर २ रजवारामे रहल राधा कृष्ण सामुदायिक वन उपभोक्ता समुहके १८औं बार्षिक साधारणसभा तथा सार्वजनिक सुनुवाई ओ जनलेखा परिक्षण कार्यक्रम सम्पन्न हुइल बा ।
समुहके अध्यक्ष खुमबहादुर खडकाके अध्यक्षतामे हुइल कार्यक्रममे सविधानसभा सदस्य विरमान चौधरी चौधरी बरका पहुना रहिट । उहाँ सामुदायिक वनके कार्य योजना ओ जिल्ला रहल वन कार्यालयसे समन्वय नैकरटसम सामुदायिक वन फस्टाई नैसेक्ना बटैलै ।
विशिष्ट पहुना भजनी–२ के वडा अध्यक्ष लालबहादुर पुन ताल तलैया सामुदायिक वनहे हस्तान्तरण करेपर्नामे जोर डेलै । थारु संग्राहलाय निर्माणके फाइल अटकल ओरसे ओकर लाग छुटयाइल ९० लाख बजेट फ्रिज जैना संभावाना रहल बटैलै । उहाँ वडा कार्यालयके बजेटसे यी सामुदायिक वनके अंगनामे गोलघर बनाइक लाग ढाई लाख बजेट डेना निर्णय हुइल बटैलै ।
सिएफसीसी भजनीके अध्यक्ष खोजराम चौधरी समावेशिता, दुरदर्शिता ओ विधिके शासनके रहिके काम करटी रहल बटैलै । सब डिभिजन भजनीके अधिकृत लाल बहादुर विश्वकर्मा सामुदायिक वनहे ७५ प्रतिशत अधिकार डेहल कहटी सब डिभिजन ओ सामुदायिक वन विच समन्वय जरुरी रहल बटैलै ।
पकरिया गाउँक भल्मन्सा मानबहादुर चौधरी सामुदायिक वनके आयव्यय नैबुझैना ओ ओकर वास्ता नैकरल कारण सामुदायिक वनप्रति विश्वास घटल बटैलै ।
संचारकर्मी जीवन चौधरी वन संरक्षण करलेसे मेर मेराइक रोग विमारसे बाँचे सेक्ना बटैलै । हरियाली पार्वती सामुदायिक वनके अध्यक्ष राहुल बुढालगायत शुभकामना मन्तव्य व्यक्त करल रहिट ।
कार्यक्रममे थारु महालोक गायक मनिराम करियामघरिया वन संरक्षण सम्बन्धी जनचेतनामुलक गीत गाके मनोरञ्जन प्रदान करल रहिट । सामुदायिक वनके कोषाध्यक्ष इन्द्र विक ३३ लाख ६६ हजार ५३४ रुप्या बराबरके आयव्यय प्रस्तुत करल रहिट । कार्यक्रममे स्वागत मन्तव्य उपाध्यक्ष विन्तीराम चौधरी ओ संचालन पत्रकार धर्मेन्द्र विष्ट करल रहिट ।
