मेगनम सामुदायिक वनके छैठौ बार्षिक साधारण सभा

पहुरा समाचारदाता
पहलमानपुर, १७ अगहन । कैलालीके घोडाघोडी नगरपालिका वडा नम्बर १२ बनबवर्षामे रहल मेगनम सामुदायिक वन उपभोक्ता समुहके छैठौ बार्षिक साधारण सभा तथा सार्वजनिक सुनुवाई कार्यक्रम सम्पन्न हुइल बा ।
समुहके अध्यक्ष रामकुमार चौधरीके अध्यक्षतामे हुइल कार्यक्रममे प्रदेश सभा सदस्य खुशीराम चौधरी बरका पहुना रहिट । कार्यक्रममे सम्बोधन करटी उहाँ अब्बे बन अतिक्रम, विनास हुइटी गैल बटैलै । उहाँ कहलै,‘ ३० बरस पहिले स्कूलके मुह नैडेखल मनै संरक्षण करले रहिट । अब्बे २१औं शताब्दीमे आके वन विनास अतिक्रम बह्रल बा ।’
सब डिभिजन वन कार्यालयके रेञ्जर केशव पोख्रेल एक व्यक्ती दुई सामुदायिक वनके सदस्यता लेहे नैपैना बटैलै । वडा–१२ के वडा सदस्य गोकुलदास चौधरी वडा कार्यालय ओ सामुदायिक वन मिल्के जाई पर्ना बटैलै ।

वडा नम्बर १२ के निबर्तमान अध्यक्ष पर्नाकमार चौधरी विधान ओ कार्ययोजनाके साथे आघे बह्रना जरुरी रहल बटैलै । घोडाघोडी सामुदायिक वन उपभोक्ता महासंघके अध्यक्ष रमेश बस्नेत सामुदायिक वनके उठल राजश्व सही ठाउँमे लगानी कैना आग्रह करलै । घोराही सामुदायिक वनके अध्यक्ष आकाश परियार गुरही तालहे पर्यटकीय क्षेत्र बनैलैसे अपनसाथ सहयोग रना बाट बटैलै ।
गुरही टोलके भल्मन्सा छोटेलाल चौधरी कौनोफे काम करेबेर समन्वय सहकार्य ओ एकजुट होके करेबेर सफल हुइना बटैलै । वनबर्षा बरका टोलके भल्मन्सा रामसिंह बखरिया वन संरक्षण कैना एकजुट हुई पर्ना बटैलै ।
पहुरा दैनिक पहलमानपुर संवादाता मायाके चिनो डेटी माया पाइक लाग माया डेहे पर्ना बटैलै । यिहे विच एकल महिलाहुकन, पहुना ओ जेष्ठ नागरिकहुकनहे सामुदायिक वनसे चडरी ओढाके सम्मान करल रहे ।
आपन भाषा, कला, संस्कृति संरक्षणके लाग थारु समुदायके मुङग्राहवा नाँचफे डेखागिल रहे । कार्यक्रममे समुहके सचिव सोनी कुमारी चौधरी आय व्यय प्रस्तुत करल रहिट । कार्यक्रममे स्वागत मन्तव्य कोषाध्यक्ष रञ्जु चौधरी ओ संचालन उपभोक्ता प्रेम चौधरी करल रहिट ।
