करमदेव सामुदायिक वनके १४औं बार्षिक साधारण सभा

पहुरा समाचारदाता
हसुलिया, २० अगहन । कैलारी गाउँपालिका वडा नम्बर २ मे रहल करमदेव सामुदायिक वन उपभोक्ता समुहके १४औं बार्षिक साधारण सभा तथा जनलेखा परिक्षण कार्यक्रम सम्पन्न हुइल बा ।
उ समुहके अध्यक्ष बासु चौधरीके अध्यक्षतामे हुइल कार्यक्रममे कैलारी गाउँपालिका अध्यक्ष राजसमझ चौधरी बरका पहुना रहल रहिट । कार्यक्रममे सम्बोधन करटी गाउँपालिका अध्यक्ष शैक्षिक अवस्था सुधार कैना कोचिङ कक्षाके लाग पालिकासे बजेट विनियोजन करल बटैलै । अब्बे सामुदायिक विद्यालयमे विद्यार्थीके संख्या न्यून हुइटी गैल बा । शैक्षिक गुणस्तर सुधारके लाग शिक्षक, अभिभावक जिम्मेवार हुइपर्ना जरुरी रहल उहाँ बटैलै ।
विशिष्ट पहुना कैलारी गाउँपालिका–२ के वडा अध्यक्ष विकास चौधरी बनुवा बचाई परठ कना चेतनाके कमी रहल बटैलै । उहाँ कहलै, ‘वन जंगल हमार स्वास्थ्य जीवनशैलीसे जोरल रहठ । बनुवामे मेरामेराइक जडिबुटी पैना ओ स्वास्थ्यके लाग अक्सिनफे प्रदान करल बा । मने दिनदिने विनाश हुइटी गैल बा ।’
सिएफसीसीके ओम प्रकाश सापकोटा सामुदायिक वनके सिमा विवाद हुइल ठाउँमे विनास हुइना करल बटैलै । उहाँ कहलै, ‘जौन ठाउँमे विवाद बा । उहाँ समझदारी ओ समन्वय कैना जरुरी रहठ ।’
सबडिभिजन वन कार्यालय उदासीपुरके बनरक्षक रामशंकर चौधरी सामुदायिक वनके आम्दानीसे विकास ओर लगैना आग्रह करलै ।
पूर्णगिरी क्लवके अध्यक्ष जनक चौधरी सामुदायिक वनमे राजनितिक दलके संरक्षणमे तस्करी हुइटी रहल बटैलै । उ सामुदायिक वनके सदस्य रामलाल चौधरी बरका बनुनासे काठी पार्इृ पर्ना माग करल रहिट । ओस्टेक उहाँ थारु समुदायमे डेखा पुरल सिकलसेल रोग उपचारके लाग सिकलसेल अस्पतालके स्थापना कैना माग करलै ।
गौरीगणेश सामुदायिक वनके अध्यक्ष मसराम चौधरी सामुदायिक वनविचके विवाद मिलैना सक्कु जाने समझदारी अपनैना जरुरी रहल बटैलै ।
प्रगती शिल समुहके अध्यक्ष नविन बोहरा, पहुरा दैनिकके पहलमानपुर समाचारदाता जीवन चौधरीलगायत मन्तव्य राखल रहिट । कार्यक्रममे समुहके कार्यालय सचिव रिता चौधरी १६ लाख ४० हजार ९५८ रुप्या बराबरके आयव्यय प्रस्तुत करल रहिट । स्वागत समुहके सल्लाकार संयोजक लक्ष्मी दहित, संचालन सल्लाकार समिति सदस्य राजाराम चौधरी करल रहिट ।
यिहे बार्षिक साधारण सभामे थारु महालोक गायक मनिराम चौधरी बन संरक्षण सम्बन्धी गीत गाके ओ लक्ष्मी चौधरी सांस्कृतिक नृत्य डेखाके मनोरञ्जन प्रदान करल रहिट ।
