आपतकालिन सूचना प्रणाली समन्वयकर्ता निर्माण सम्बन्धी कार्यशाला गोष्ठी सम्पन्न

पहुरा समाचारदाता
धनगढी, २१ अगहन । आपतकालिन सूचना प्रणाली समन्वयकर्ता निर्माण सम्बन्धी कार्यशाला गोष्ठी शुकके रोज धनगढीमे सम्पन्न हुइल बा ।

माफा जापन, वल्र्ड भिजन जापनके आर्थिक सहयोगमे वल्र्डभिजन इन्टरनेशनल नेपालके ओ सामाजिक विकासका लागि सचेत समाज (सिएसएसडी)के साझेदारीमे सञ्चालित सिविडिआरआर परियोजना अन्र्तगत विपत प्रतिकार्यमे सहजता अपनैटी भौतिक तथा मानविय क्षति न्यूनिकरण कैना उद्देश्यसे सामुदायिक विपद व्यवस्थापन समिति ओ कार्यदलविच अन्तरक्रिया कैगिल बा ।

कार्यक्रममे सामाजिक विकासका लागि सचेत समाज (सिएसएसडी)के साझेदारीमे सञ्चालित सिविडिआरआर परियोजनाके परियोजना संयोजक भरत विक परियोजनाके गतिविधिबारे जानकारी डेहल रहिट । ओस्टेक करके विपदबारे, विपद प्रतिकार्यबारे सहजीकरण सहजकर्ता लोकराज जोशी करल रहिट ।

कार्यक्रममे जिल्ला प्रशासन कार्यालय कैलालीके प्रशासकीय अधिकृत तथा जिल्ला विपद व्यवस्थापन फोकल पर्सन शिवराज जोशी विपदके बेला अपाङता रहल व्यक्ति, बालबालिका, जेष्ठ नागरिक असक्ता व्यक्ति सबसे ढेर प्रभावित हुइल बटैलै । विपदहे कोईफे रोके नैसेक्ना मने पूर्व तयारी करके न्यूनिकरण करे सेक्ना ओरसे सक्कु तह तप्का आ अपन ओरसे लागे पर्ना सुझाव डेलै ।

कार्यक्रममे ओरेक नेपालके जिल्ला संयोजक गीता चौधरी बाढ प्रकोपमे उद्धारके लाग महिलाहुक्रे खटे पर्ना ओरसे उद्धार प्रतिकार्य सम्बन्धी तालिममे महिलाहुकनहे समावेश करे पर्ना बटैली । प्रतिभा चौधरी विपदके बेला गाउँघर बरघर÷भल्मन्साहुकनके भुमिका अग्रणी डेखल ओरसे उहाँहुकनफे तालिम डेलेसे मजा रना बटैली । कार्यक्रममे फाया नेपालके अध्यक्ष गोमा आचार्य विपदहे न्यूनिकरण कैना कार्यदलहे सक्रिय बनैना जरुरी रहल बटैली ।

कार्यक्रममे सामाजिक विकासका लागि सचेत समाज (सिएसएसडी)के क्रिमलाल चौधरी, टमान संघ संस्थाके प्रतिनिधिहुकनके सहभागिता रहे ।