जिविका कृषि सहकारीके आठौं बार्षिक साधारण सभा
जीवन चौधरी
पहलमानपुर, २३ अगहन । कैलालीके घोडाघोडी नगरपालिका वडा नम्बर १० पहलमानपुरमे रहल जिविका कृषि सहकारी संस्था लिमिटेडके आठौं बार्षिक साधारणसभा तथा सार्वजनिक सुनुवाई कार्यक्रम सम्पन्न हुइल बा ।
सहकारीके अध्यक्ष देशराज सत्गौवाके अध्यक्षतामे हुइल कार्यक्रममे उहाँ सहकारीके भवन लाग प्रदेश सरकारसे सहयोग कैडेना अनुरोध करलै ।
कार्यक्रमके बरका पहुना सुदूरपश्चिम प्रदेशसभा सदस्य खुशीराम चौधरी सहकारीके प्रगतीके लाग इमान्दारिता ओ उद्देश्यके साथ आगे बहू्रना आग्रह करलै । उहाँ सहकारीसे वितरण हुइल कृषि सामाग्रीके दुरुपयोेग हुइल बटैलै । घोडाघोडी–१० के वडा सदस्य रोहित बम सहकारी प्रभावकारी हुई नैसेकल ओ कृषकहुकनहे चाहल पत्ता नैहुइल बटैलै ।
मोहन्याल बचत ऋण सहकारीके अध्यक्ष बजिर सिंह बम सहकारीमे टमान मेरसे आक्रमण हुइल बटैलै । ग्रामीम कृषि सहकारीके अध्यक्ष खम्ब बहादुर शाह सहकारी संस्थासे कृषिहुकन लाग वितरण कैना मल नैपाइल गुनासो करलै ।
कार्यक्रममे सहकारीक व्यवस्थापक सुन्दर चौधरी १ करोड १० लाख ६७ हजार ५४२ रुप्या १ पैसाके आयव्यय विवरण सुनैलै । यिहे विच सहकारीसे असल कृषकहुकनहे ५० प्रतिशत अनुदानमे इलेक्ट्रिक स्प्रे टङकी हस्तान्तरण करले बा ।
कार्यक्रमके स्वागत मन्तव्य कोषाध्यक्ष सुस्मा चौधरी ओ संचालन सचिव खुशीराम चौधरी करल रहिट ।
